姜皓文《刑偵》煞科跪地爆喊 為愛妻主動再隔離14天

姜皓文（黑仔）為拍攝的無綫劇集《刑偵日記》特意外出租屋居住，上星期劇集煞科，經歷了長達4個月的拍攝，在酷熱天氣和疫情下終於順利完成，黑仔也放下心頭大石，距離回家之路又近了一大步。

黑仔最後一天的拍攝並不輕鬆，不但要跪地拍攝，更有不少情緒激動的戲份，淚流滿臉。黑仔表示：「拍場戲之前一路都好緊張，因為劇集埋尾，臨到尾我有好多情緒戲，都幾緊要，時間愈緊，我就愈緊張，我自己畀自己壓力又好大，不過好彩劇本寫得好，順住劇本去就好順利。今日幾場戲效果好好，拍完成個人放鬆晒！」最後劇組送上花，與工作人員大合照，為黑仔的拍攝畫上完美句號。

至今已個多月沒有回家的黑仔表示，拍完劇後最想盡快回家：「第一時間要返屋企見下啲小朋友（愛犬），好耐冇見佢哋，其實都未返得屋企住嘅，等一個多星期自己再隔一隔離先返去，不過心情已經唔同晒啦！」