【《飛虎3》被飛】坦承鬱結唔開心陳敏之直播呼：愛國愛港

2020-08-27 13:56

陳敏之上月初亮相有份參演的新劇《飛虎之壯志英雄》（飛虎3）拜神儀式，有指敏之因曾在社交網分享涉政治議題圖片，疑遭內地網民抵制，而《飛虎3》是與內地平台聯手製作，故她被匆匆易角，由陳煒取代。昨晚敏之收工後回家下廚炮製至愛的街頭小食陳皮魚旦、豬皮、蘿蔔，邊煮同網民互動傾談，乘機親述被飛鬱結，坦言此事令她唔開心，成個人都憔悴晒及消瘦了。

她直播煮嘢食時，對網民說：「最近我消失咗咁，我都好掛住你哋呀！其實最近唔開心，化悲憤為食嘢同煮嘢，因為疫情鍾意咗煮嘢食，煮嘢食可以減到壓。」

解畫係想由神嘅愛去解決所有問題
重提被指涉及政治意味的照片，她解畫：「喺年幾前放呢張相上去，係個好簡單想法，認識我知道我有宗教，只想表達人嘅力量有限，藉住神嘅愛去解決所有問題，完全冇諗過件事搞得咁複雜，所以為呢件事有唔開心，我個人好簡單，只係想開開心心，希望個世界多啲愛，作為媽咪嘅我，都只想喺好和平、健康嘅社會中生活...你哋唔使擔心我，多謝大家支持同明白我，我係瘦咗呀！心情唔好，個人都憔悴啲…都要做吓運動，否則屈到病。」

同時，她又帶點激動說：「我想講…我係一個土生土長嘅香港人，我哋有幾愛我哋家園，大家都好愛呢個地方，呢個地方由出生到𠵱家有好多好好嘅回憶，所以我點會唔愛香港？同樣地，我係中國人，我又點會唔愛我哋嘅祖國？其實係一樣嘅，點解會唔愛呢？我堅持大家要正能量，一定可以令大家快樂同健康，同你哋傾完，我係鬆咗，鬱結冇咁多喇！」