【維港會】奶奶氹新抱生仔承諾退休湊孫 懷孕後即反口：湊B得幾千蚊

現今不少女性都不會做全職媽媽，但兼顧上班和湊B經常壓力爆煲，有時需要奶奶幫忙照顧孩子。有港媽在「我的極品四大長老」Facebook專頁投稿，斥責奶奶反口，當初為氹她生B，承諾退休後幫忙照顧孫仔，豈料懷孕6個月後奶奶馬上反口，明言湊孫錢少又要看面色，孩子出生後港媽更因此患上情緒病，引起網民熱議。

港媽和奶奶及姑奶同住，本來都和睦相處，但幾年前奶奶退休，不斷催她生B，更承諾會湊B，「個個都叫我生，亦比壓力我生」。結果懷孕6個月時，奶奶就反口：「叫家嫂的娘家湊BB啦，反正佢全職家庭主婦咁多年，而且自己媽媽湊好一點，費時為了湊孫而同新抱吵鬧」。結果奶奶和娘家都不肯湊B，港媽本打算辭職，但老公不同意，認為孩子出生後需要錢。奶奶更直言「我依家有人介紹份工比我退休做呀，有9千幾蚊一個月，同你地湊BB得幾千蚊，得陣仲要睇你地面色!！」

後來老公請了工人姐姐照顧孩子，但豈料惡夢開始，姑奶結婚後讓老公搬入同住，奶奶和姑奶抱怨工人肥胖、大食，又無禮貌、清潔不乾淨，姑奶更每晚向港媽投訴工人勾引她老公。港媽幫工人說話，奶奶就訓斥港媽要管好工人，而港媽老公更完全沒有幫忙，反說男人不方便和工人講。

港媽壓力爆煲經常爆喊，被醫生診斷為情緒病初期。最後工人被炒，由奶奶湊B，但一直沒有好面色，「佢話當年係話退休後如果無野做就同我湊BB！咁有人介紹工接住退休後做又好pay就唔同講法」。事件成為港媽心結，「我嬲足幾年，係咪我太小器? 我依家唔係嬲佢，而係討厭佢食言討厭佢語言偽術。」

事件引起網民熱議，有人為港媽打抱不平，「搬開住，自己話事食鹹魚青菜都好味，重要係二老都吾洗旨意睇」、「99講嘢都好信。講完就散啦」，亦有人就指生仔要自己負責，「有乜好嬲，仔女生咗係自己嘅，人哋事前事後講乜都係得個講字，冇任何責任要負，生小朋友前就要隨時做好自己負責到底嘅準備」、「小朋友第時知道自己嘅出生係因為嫲嫲叫媽媽生自己出嚟，情何以堪」。