【維港會】網民翻舊帳要求「吞file找數」湯文亮唔認輸:制裁無關人權法　

2020-08-08 17:14

美國財政部昨晚公布制裁11名中港官員名單，一向言論惹火嘅紀惠集團行政總裁湯文亮成為網民「翻舊帳」目標。事源佢3月時曾在社交平台「豪言」，「如果美國在半年內實施人權法，我將個file吞落肚」，網民紛紛留言要求「找數」。不過湯文亮回應指，「唔好話我輸，制裁並不關人權法，是因為港區國安法。」

湯文亮在今年3月10日時曾在其Facebook上發文，當中提及「如果美國在半年內實施人權法，我將個file吞落肚，沒有問題」。美國財政部昨宣佈制裁11名中港官員，而湯博士早前嘅「豪言」隨即被民翻舊帳，紛紛留言要求「找數」。有網民坦言「幾時表演食file 十分期待！」、「食file未呀，嫌啖可以落鹽」、「博士找數 live?」。KOL薯伯伯更稱：「等睇湯博找數食file，但講到最想睇佢表演嘅人，我估應該係嗰對聽佢講唔買二千萬樓，用晒錢買匯豐嘅夫婦啩。」

不過，湯文亮其後在社交平台回應，「唔好話我輸，制裁並不關人權法，是因為港區國安法。」，一眾等食花生嘅網民對湯博士拒找數感失望，笑言係「公我贏，字你輸」。

湯文亮近月言論多次引起網民關注，其中滙豐早前罕有宣佈不派息，湯文亮被指前年在專欄中，提到曾叫一對夫婦「棄樓買滙豐」，滙豐不派息後有關言論再成熱話，湯文亮以「純粹虛構故事」解畫，惹網民爭議。