【維港會】涼薄僱主組合櫃床做「姐姐房」網民：同瞓棺材冇分別

不少港人家庭都會聘請外傭姐姐，但姐姐的住房問題一直是個難題。今日有網民分享何文田一個新裝修的居屋單位，客廳有一個組合櫃床，原來是「姐姐房」，讓姐姐做休息室，招來網民抨擊，被鬧爆焗死姐姐。

網民在「外傭僱主必看新聞訊息」Facebook群組分享相片，「頭先睇裝修group，何文田XXX新裝修單位，業主訂制咗圖中個櫃上格比姐姐做休息室。」只見客廳一個大型組合櫃，最高到天花板，分為兩層，下層側面有樓梯可爬到上層，而上層是可拉式趟門，外傭姐姐可爬入睡覺，但就無法站直身，亦不知通風效果。

網民鬧爆僱主涼薄，「條樓梯上都算，唔知點落，瞓到睡眼星鬆仆死都似」、「咁瞓同瞓棺材冇分別」、「多啦a夢嘅概念。。。細個我仲以為多啦a夢訓衣櫃係痴咗線」、「其實已好過無私人空間，但入面唔知有無預通氣，無就真係唔得」。亦有人就感嘆香港人住屋問題，「其實好多香港人住嘅地方同呢個床位不相伯仲或許更差，要正視下住屋問題喇！」