【獨家】地獄廚神學廚箍另一半樂宜讚ERROR嘅肥仔好正

曾於《美女廚房》擔任「美女學徒」的樂宜（前名洛兒），繼早前參與另一飲食節目《辣伙頭》後，近日又固定演出ViuTV節目《索女人妻ichi烹》，仲拋出34C胸跟黃天頤鬥煮西餐。雖然入廚經驗已累積兩年，但樂宜的廚藝似乎冇乜進步，為做「Charm女友」，她表示會積極鑽研煮食，箍住未來男友個胃！恨拍拖的樂宜還自言不再「外貌協會」，仲讚ERROR成員肥仔好正！採訪：黎寶倫

之前於《辣伙頭》火燒廚房的樂宜屢試屢敗，今次在新節目中就整「西班牙蛋餅」，嘉賓ERROR成員肥仔和保錡大彈又燶又油，其後再挑戰煮西餐，另一嘉賓王貽興食完即吐落垃圾桶，「地獄廚神」之名的確不是流的，她尷尬地笑：「一半半啦，有時都覺得煮岀嚟好食嘅，我最叻煎牛扒，睇色澤5成、7成熟啱啱好，都合格嘅。」既然廚藝麻麻哋，可會渴望找個廚藝了得的男友？樂宜則認為女仔識煮嘢會較吸引，亦容易留得住男人心，故自己會努力學廚，另一半在旁鼓勵便可。

渣男磁石
談到感情狀況，樂宜不諱言希望多啲追求者，又自爆早前被師傅批多爛桃花，好易遇渣男，搞到她也心驚驚，即刻改回本名「樂宜」。笑問有否遇過熱衷「多人運動」的渣男？她說：「咁又冇，只係遇過比較花心。（劈腿？）睇到佢突然有Message彈岀嚟，但我冇攤牌，因為唔想面對，好驚好慌呀，所以我會走。」做夜場DJ的她又謂不會在夜場搵男友，希望找個陽光男孩。那麼恨拍劇的她想跟哪位男神合作？樂宜笑道：「之前想同靚仔男神黃宗澤合作，𠵱家又想向搞笑方面發展，所以好想同ERROR合作，我好鍾意肥仔！細個鍾意6嚿腹肌，但大個發現肥仔肉肉哋都幾好，佢識搞笑代表佢EQ、脾氣都好。」