【頭條獨家】《金都》後未想再當導演 黃綺琳得獎令信心大增
2020-06-09 23:00 
出過書、填過詞、寫過無數電影電視劇本，反而首次執導電影《金都》令黃綺琳打響名堂，她坦言最初完成這個滿意劇本時，沒想過親自執導，但太愛這個作品又不捨讓給人家拍，於是成就了這個金像獎新晉導演。黃綺琳坦承《金都》之後未想過再當導演，得獎後令她信心大了，不會再逃避會正視這些機會，但暫時只限拍自己寫的劇本，怕未有能力駕馭別人的作品。採訪：杜淑霞
自小在太子「金都商場」附近長大的黃綺琳，從小便對婚姻和愛情很好奇，「記得5、6歲時表妹同我講，我阿爸阿媽結咗婚，我仲好驚奇，又會問我阿媽，我幾多歲可以申請老公呢？我以為係政府分配個老公畀你，嗰時經過『金都』都好好奇，到大個咗朋友結婚陪佢哋再入去，發覺比想像中廉價同俗氣。」
「金都」除了伴隨黃綺琳成長，也有着她對婚姻和愛情的憧憬，她坦承有透過戲中鄧麗欣飾演的「阿芳」，她重新審視以往每段愛情關係，伴侶之間缺乏溝通正是致命傷。「好似指甲鉗嗰場戲，其實係我以前一個男朋友好鍾意咁做，但係我個人係鍾意逃避溝通，冇當面同佢哋講，反而喺作品度反映我嘅不滿，其實幾弊㗎！拍完呢套戲，我學識咗每段關係溝通係最緊要。」
電影雖然在港幾大頒獎禮得到不少獎項及提名，但以編劇工作為主的黃綺琳坦承最初真的沒想再執導，「我寫完《金都》呢個咁滿意嘅劇本，達到創作嘅高潮就諗住算，都有人問過我攞嚟拍，但我真係唔捨得，好似自己嘅親生仔畀咗人湊咁，而呢個戲真係好自己嘅故仔，最後咪自己拍番。諗住之後未必會再做導演，但今次得咗獎，信心係大咗，唔會再避，會認真去諗呢個問題，不過暫時都係拍自己寫嘅劇本好啲，人哋嘅劇本我未必有感覺去拍。」
最新回應