《飛虎》表現獲讚賞黃宗澤風騷晒新寵行山相

2020-05-26 12:30

黃宗澤(Bosco)喺TVB新劇《飛虎之雷霆極戰》中飾演MI6，有超水準表現，其中一集用英文同變節特工談判，講足兩分鐘英文，喺咬字同發音方面明顯落咗唔少苦功，唔少網民都讚好！風騷Bosco昨日喺社交網出Po，題為「帶親女行山日」， Po出分別喺大樹下及LAP動物庇護慈善機構領養回家的沙皮Kasha及唐狗Kabaka行山相，但Bosco就沒有出鏡。相中兩隻可愛小狗置身青蔥高地，Kabaka行到伸晒脷，要趴喺草地飲水抖一抖。兩隻小狗獲唔少網民大讚精靈可愛，又讚Bosco愛心爆棚，當然，就算Bosco冇現身，都獲fans留言讚《飛虎》角色好型。不過，有網民發現Kasha指甲太長，提醒主人要幫狗狗剪甲啦！因為指甲太長，狗狗走路會好辛苦。最搞笑有網民留言話：「大叔Bosco你咁嘅年紀應該親大嬸日」。

支持領養流浪動物

去年8月跟Bosco情同父子嘅都柏文愛犬Usher離世，黃宗澤很傷心，在網上傷痛留言：「爸爸就送到你這裏了，下輩子再見，謝謝你陪了我那麼多年！I miss you always!」之後他便分別領養了Kasha及Kabaka，身體力行支持領養，希望救得一隻流浪狗得一隻，相當有愛心。他對本報記者表示，領養咗大半年啦，兩隻狗女不經不覺都差唔多一歲大，他得戚道：「我得閒就會帶埋佢哋行山，仲會行到上山頂嗰隻，行得都幾甘㗎，所以好難野山捕獲到我哋，除非用航拍啦，哈！」