星島日報

【專欄】三場大賽又開波

2020-04-25 09:14
當全球大部分馬場停擺之際,香港仍可「馬照跑」(資料圖片)
當全球大部分馬場停擺之際,香港仍可「馬照跑」(資料圖片)

明天,香港所有高班馬又傾巢而出,競逐三場國際一級賽。最大遺憾,完全冇外國馬及外國高手騎師參賽。不過,今時今日,當全球大部分馬場停擺之際,香港仍可「馬照跑」,咁就不但收晒貨,更要誠心感謝上天啦!

未講山埃貼士前,先有感而發。香港,從來應該是個國際頂級城市,所以,政策上應吸引全球精英來此(香港薪酬絕對吸引!),坐鎮各行各業領導位置,將香港競爭力,不停推向高峰,誓要將「紐倫港」叮噹馬頭之勢繼續。

這樣,香港對中國,才能發揮最大貢獻,同時,亦標誌「一國兩制」成功落實,傲視全球。

可惜,N又N咁多原因(一講就必互相指責卸膊),搞到過渡二十幾年仍「革命尚未成功,同志仍須努力」。最近,政府又大換班,睇個卡士,老老實實,大家會否有信心?而對政府管治能力,又會否抱有期望?

其實香港素來臥虎藏龍,某啲精英,覺得與林鄭「唔啱嘴形」,堅拒入熱廚房(佢哋話除非換咗阿頭才考慮!)。

另一批非常有卡士人物,則礙於《基本法》規定,不能進入政府領導層,因非中國人也。

舉個例,若香港馬會總裁應家柏可以出任政務司司長,咁就掂過碌蔗矣。你唔識佢?不理解佢能力?問下佢下屬就知!大家睇睇,疫情之下,馬會應對幾高章?不但馬照跑,令政府稅照收,善款滾滾來,更犀利,閉門賽馬而總投注額竟僅微跌。這不是「天降奇迹」,要好多人為部署㗎!發完廣納人才夢,講講明天三場大賽,出馬全部熟口熟面。

「女皇盃」跑二千米,「時時精綵」未輸過,必熱。咁就搏佢伸隻冷腳入Q,一拖六可也!

「冠軍一哩賽」,輪住威,應該到番「夏威夷」嘞。腳拖「嘉應之星」、「川河尊駒」及「幸福笑容」。

「主席短途獎」,「忠心勇士」仲唔真身?大摩要搵退休金㗎!一於拖晒蔡約翰三隻啦!

放完山埃,祝大家有個Happy Weekend!(曾智華)

全文刊於《星島日報》「阿碌開咪」專欄

最新回應

熱門文章