【疫下開工】陸漢洋買垃圾袋笠枱櫈　苟芸慧嫌老公過份緊張

新冠肺炎疫情肆虐全球，各行各業大受影響，娛樂圈亦不例外，不論活動、電影、舞台劇、演唱會等通通煞停，不少藝人近乎零工作，「幸福人妻」苟芸慧（苟姑娘）也坦言好多工作延期，有些延至年底，但都要睇到時情況，她說：「如果疫情仲係咁嚴重，可能年底都未必做到，不過呢啲事大家都經歷緊，對我嚟講，等待嘅嘢可能係更美好，唔需要咁心急，或者都係一個好嘅經歷，可以畀我喺屋企多啲休息，諗諗之後嘅路點行，同埋睇多啲戲，欣賞下前輩演技，再次準備好自己。」

然而對苟姑娘來說，最大的影響是未能飛返加拿大見屋企人，「本身打算返加拿大，因為爹地、媽咪、細佬都喺嗰邊，好想返去見佢哋，但可惜而家飛唔到；我亦好想去旅行，唯有睇旅遊節目當去咗，有時播緊旅遊節目，我會叫老公（陸漢洋）幫我喺電視機前影相，當去咗。」但可幸的是，近日在「疫」境下她仍有工開，日前，苟姑娘為代言的地產按揭公司拍攝新一輯廣告，當日即使拍足12小時，她都依然狀態大勇。問到出門拍攝可有做足防疫措施？她即沒好氣表示：「我老公超級緊張，反而我就隨遇而安，我覺得大家戴口罩、量體溫、用消毒搓手液洗手，已經好安全，但佢就緊張到會買啲垃圾袋嚟笠晒啲櫈、舖晒啲枱，搞到好唔方便，我明白佢嘅出發點為我好，但有時似乎過分緊張吧。」

雖然經常留守家中，但苟姑娘沒有因而增磅，依舊Fit爆，全因她在家中依然運動量十足，除了閒時跟老公打機外，亦大玩HITT（High Intense Interval Training）運動及研究生酮飲食。問到可有趁空檔入廚整蛋糕？擅長整甜品的苟姑娘說：「留喺屋企都會做自己開心嘅嘢，例如整蛋糕，不過老公唔食甜嘢，整完都係攞落樓下請清潔姐姐佢哋食。」

提到今次拍地產按揭廣告，苟姑娘自言對投資沒有太多心得，自己正努力學習中，但她都好傳統，偏向喜歡「買磚頭」保值，至於有否打算做生意開甜品店？苟姑娘說：「有打算開班授徒，將自己識嘅嘢教畀人，等佢哋又可以整甜品畀身邊嘅人食，係一件好開心嘅事，所以我都有同朋友商量，待疫情過後，租個地方輪流教學生。」