自爆身體不適漏夜睇急症　Cardi B爆粗否認患新冠肺炎

新冠肺炎於美國大爆發，當地確診個案至今已破24萬宗，上月爆粗大鬧中國傳出新冠肺炎病毒，仲直言驚到開始囤積糧食的美國饒舌天后Cardi B，前日於社交網忽然自爆因身體不適而漏夜入急症室，並附上一張病人手帶照。雖然她補充病情已好轉，其後此帖文亦已被刪除，但消息曝光後，隨即引來大批網民猜測Cardi是否中咗招！

對此，Cardi昨日即於Ig開Live澄清並非染疫，她爆粗表示：「過去5日我都好X病……唔係新冠肺炎。我有好嚴重嘅腸胃問題……我有嘔……我有接受懷孕測試，因為你永遠都唔X知（係咪懷孕）。」但Cardi續指自己冇懷孕，並謂本身因腹痛而致電醫生到家中診症，惟現時因疫情問題，醫生不准許進入別人家中，故醫生不斷叫她飲薑茶；她又表示因滯留洛杉磯，使其飲食習慣有所改變，而大部分糧食均來自餐廳，Cardi說：「冇人幫我煮嘢食。之前我有請過廚師，但兩次都又貴又衰。」由於4日幾乎冇食過嘢，才令她感到不適，並透露周五將會再睇醫生。