星島日報

【頭條獨家】陪玩陪沖涼 歲半囝囝唔悶得 林芊妤拖老公出街買玩具

2020-03-23 21:41
林芊妤日前拖老公翟志榮出街買玩具畀囝囝。
林芊妤日前拖老公翟志榮出街買玩具畀囝囝。

30歲林芊妤(Coffee)自18年下嫁銀行高層翟志榮(Weng),再火速誕下兒子翟德彥(翟伯伯)後,一向鍾意喺ig晒「最強Body」的她,隨即變成「晒B狂魔」,日日Po囝囝萌照。眼中只有阿仔的Coffee,乜都以翟伯伯為先,連老公都要企埋一邊!日前,她就拉埋老公去銅鑼灣買玩具𠱁囝囝,本來兩夫婦手拖手好鬼Sweet,但一入到玩具店老公即被冷落,睇Weng個無癮樣應該習慣晒!採訪:梁志明

難得撇下囝囝,Coffee日前跟老公翟志榮甜蜜拖手行街街。
難得撇下囝囝,Coffee日前跟老公翟志榮甜蜜拖手行街街。
Coffee專注揀玩具畀囝囝,老公則被冷落在一旁。
Coffee專注揀玩具畀囝囝,老公則被冷落在一旁。

抗疫時期,相信都考起不少家長,除了要安排活動給小朋友解悶,出街也要想盡辦法𠱁BB戴口罩!好似林芊妤的囝囝翟德彥咁,經過數星期的拉鋸,1歲5個月的翟伯伯終於肯就範戴口罩。不過,近期新冠肺炎確診個案明顯大幅上升,Coffee都減少帶囝囝外出,身為瑜珈教練的她就日日於家中,跟兩父子一齊做運動、瑜珈Keep fit,見阿仔「宅」喺屋企咁悶,早前Coffee更犧牲色相,將靚樣當畫紙任由翟伯伯擺佈,結果塊面被畫到花喱碌。

專注揀玩具
在家中玩到冇嘢好玩,日前Coffee就撇低囝囝,與老公到銅鑼灣買嘢𠱁仔開心。當日下午5點幾,夫婦倆以一身夏天Look現身街頭,難得過吓二人世界,他們全程都Sweet爆十指緊扣,雖然等過馬路期間,Weng一度鬆開老婆隻手撳電話,但篤咗幾吓,他好快又拖番實對方。步行至皇室堡,「阿仔大過天」的Coffee直接走入玩具反斗城,替翟伯伯物色新玩具,其間Coffee都好細心地逐件拎起研究,仲踎低慢慢揀,間中亦會手指指問老公意見,不過Weng似乎就冇咁講究,企埋一邊講電話又發吓吽逗。

翟志榮鬆開老婆手撳電話,Coffee即刻𥄫實個Mon。
翟志榮鬆開老婆手撳電話,Coffee即刻𥄫實個Mon。
Coffee繼續當老公冇到,仲不顧儀態踎地慢慢睇。
Coffee繼續當老公冇到,仲不顧儀態踎地慢慢睇。

知衰𠱁老公
又難怪咁無癮嘅,之前Coffee都講到明:「他(兒子)出世前我根本不知何為真愛啊老公!」囝囝同老公喺屋企的地位高低,真係一目了然!最終逛了近1個鐘,Coffee攬住一Set迷你羽毛球套裝、一大支泡泡水和一大盒《Toy Story》吹泡機去畀錢,雖然Weng的參與度勁低,但離開的時候,大大隻的他都有幫手做苦工。見老公孭住個布袋,另一隻手又抽住大袋戰利品,她都好識做,喺搭扶手電梯時Back hug對方,之後更主動搶番個布袋嚟拎,Weng都即刻冧晒,同老婆十指緊扣坐地鐵歸家。

最終,Coffee掃了迷你羽毛球套裝及吹泡泡套裝給囝囝。
最終,Coffee掃了迷你羽毛球套裝及吹泡泡套裝給囝囝。
見老公咁無癮,Coffee即刻Back hug呵番對方。
見老公咁無癮,Coffee即刻Back hug呵番對方。
翟志榮幫手拎住袋戰利品,Coffee亦主動孭番個布袋。
翟志榮幫手拎住袋戰利品,Coffee亦主動孭番個布袋。
Coffee日前晒出母子出浴照,仲話:「日日都喺屋企拍拖。」
Coffee日前晒出母子出浴照,仲話:「日日都喺屋企拍拖。」
Coffee自言明知餵人奶胸部會老10年,她都甘願繼續餵1歲幾未斷奶的囝囝。
Coffee自言明知餵人奶胸部會老10年,她都甘願繼續餵1歲幾未斷奶的囝囝。
已為人母的Coffee產後仍勤力做瑜珈,身材Fit爆!
已為人母的Coffee產後仍勤力做瑜珈,身材Fit爆!
Coffee一早已替翟伯伯開ig做KOL,經常整蠱囝囝的她笑對方似「阿叔」,仲頻頻公開其趣怪樣,好似去廁所……
Coffee一早已替翟伯伯開ig做KOL,經常整蠱囝囝的她笑對方似「阿叔」,仲頻頻公開其趣怪樣,好似去廁所……
……就連搓腳睇電視等生活照都一一被公諸於世,成功吸引12.2萬Follower,人氣拍得住李璨琛囡囡李元元!
……就連搓腳睇電視等生活照都一一被公諸於世,成功吸引12.2萬Follower,人氣拍得住李璨琛囡囡李元元!

最新回應

關鍵字

相關新聞

熱門文章