新節目講錯嘢遭網民批評　伍詠薇fb開Live接受批評

伍詠薇（伍姑娘）主持的ViuTV新節目《埋嚟睇﹒埋嚟玩》昨晚首播，早前她已預告節目內會派錢，每日派4千，一星期5集就合共派兩萬元，而遊戲玩法是主持公佈問題後，觀眾只要透過節目提供的Whatsapp號碼提交答案，最具創意的4位參賽者，便可瓜分4千玩獎金。至於第一集的問題是：「最想任食啲咩？」未料，一條咁普通嘅問題於節目出街後，居然引來極大迴響，原因並非觀眾的答案幾咁有創意，而是伍姑娘的反應和對答，令觀眾及身邊4位年輕主持好「驚」喜！

事緣一名男觀眾稱最想任食「阿嫲煮嘅南乳炆鵝」，伍姑娘於是問點解啦，對方就回答：「因為已經冇機會再食啦。」語畢一眾年輕主持一臉嚴肅，豈料伍姑娘繼續吳若希上身追問：「點解呀？」男觀眾表示嫲嫲已經「上咗天堂」的同時，伍姑娘亦細細聲地口噏噏問：「Ham（指『香（死）』）咗？」年輕主持們聽到即面露惋惜，不過大情大性的伍姑娘卻謂：「咁你可以學整㗎嘛！你唔識我哋教你整好冇？」男觀眾惟有客氣話好。對此，不少網民認為伍姑娘的對答不太恰當，有人斥：「好離譜囉……唔使問都明白啦吓話……」，亦有人建議：「其實答『好理解你感受』就夠。」

事後，伍姑娘都好願意接受大家的批評，剛才更於社交網上載一段短片，她說：「多謝大家昨晚睇《埋嚟睇﹒埋嚟玩》，好多謝你哋，收到好多朋友嘅意見，綜合意見後，我覺得開心嘅咁多人睇。」並預告今日6點在Facebook開直播，與網民互動分享，仲叫大家畀多啲意見，《埋嚟睇﹒埋嚟玩》的團隊會繼續努力，多多指教咁話。