【維港會】新世界慈善基金 投資千萬製口罩

肺炎疫情人人自危，好多國家都爆發搶口罩潮，新世界之前高調預告會在香港成立兩條口罩生產綫，日產二十萬個，第三代話事人鄭志剛（Adrian）昨日話，香港人要靠自己生產「香港製造」的口罩，仲透露會加入「納米鑽石」塗層，達到ASTM Level 1標準，最快四月出爐。

Adrian早排專心幫香港人撲口罩，接觸過俄羅斯、以色列、中東供應商，發覺價格好飄忽，於是決定在香港自家設立生產綫，全數由新世界慈善基金投資一千萬，唔會動用股東一分一毫，仲會免費派畀基層，多出就以成本價賣畀非牟利機構。

就算疫情過去，Adrian話長遠香港都有公共衞生都需要口罩，今次仲會同科學園初創企業研發「納米鑽石殺菌口罩」，希望可以生產低成本殺菌口罩，無論人力物力都係新世界團隊提供，唔向政府申請資助，務求造出「香港製造」口罩，仲寄語：「香港人自己靠自己，逆境下化成轉機」，志氣唔講得笑。