【創科廣場】人民的希望

美國Gilead Science研發Remdesivir變成新冠狀病毒「神藥」，股價升上了一年半新高，市場無限。

Remdesivir作為新冠狀病毒解藥，以干擾病毒RNA聚合酶抑制病毒，獲得愈來愈多肯定，即使世衞亦以Remdesivir為最大寄望，研發Remdesivir的Gilead Science，股價應聲向上。

解藥遠水難救近火，最有效阻止疫症傳播就是隔離，但單從外表難以判斷病徵，機場及公共場所馬上配置體溫檢測，全球最有名以紅外熱成像技術嘅光電系統研製生產企業，亦位於武漢，名叫「武漢高德紅外」。

武漢是全國軍需工業重鎮，遍地科技高手，特別紅外熱感技術，應用夜視或者導彈；高德紅外係深圳上市公司，熱成像技術則應用在電力、工業檢測、安防監控、機器視覺及消費電子等民用，其中一項就係以紅外綫熱成像的人體體溫監測系統，供人流密集公共場所進行大面積監測，可找出追蹤體溫較高人員。香港唔少大廈即刻訂貨，如今高德紅外日以繼夜生產。

自從年初新新冠病毒2019-nCoV爆發之後，高德紅外人體體溫監測系統供不應求，全球機場火車站，甚至商業大廈爭相訂購，高德紅外股價從年初21元人民幣，急升到最高見55元人民幣，升幅超過一倍，市值高達440億元人民幣。

CPC自家製人體體溫監測系統

人體體溫監測系統價格從5000至30000美元不等，都供不應求；結果中信國際電訊CPC開發團隊，決定自行開發人體體溫監測系統，價錢只係十分一左右，負責開發嘅CPC技術及創新總裁Daniel Kwong話，自從有關消息在「飛卜」上透露，就有唔少查詢。

系統除咗有警告功能，CPC以人工智能及雲技術，提高檢測精準度。佢話研發只係為內部用途，Daniel在「飛卜」提及之後，馬上有大量客仔查詢，見企大家面對共同難題。Daniel話，計畫係利用敏捷開發模式，集合香港、中國內地及歐洲三地開發人員，有如內部Hackathon一樣，短期內開發及加入功能。本刊下期會詳細介紹有關計畫。

雖然CPC自家製人體體溫監測系統，當然無高德紅外咁專業，不過對50人以下辦公地點，應該無問題。系統已在5個辦公地點試驗，效果良好。佢話系統絕非為盈利，將來可能公開畀有需要嘅公共機構。

講返Gilead研發Remdesivir，係一種抑制病毒RNA聚合酶；本來用於對付另一種RNA病毒伊波拉（Ebola），可惜去年剛果嘅伊波拉病毒疫情，表現不如另外兩種藥物REGN-EB3和mAb114；本來投資要泡湯，突然發現對多種冠狀毒病，包括SARS-CoV和MERS-CoV，體外試驗都有良好抑制效果；變成冠狀病毒「神藥」。

雖然說，Remdesivir仍未正式通過藥檢，預料中國加快以Remdesivir臨牀測試審批。多國政府亦似乎未能控制疫情，隨疫情擴散，新冠狀病毒隨時出口變內銷，假若疫情無法控制，剩下唯一寄望，就是疫苗及解藥。

新冠狀病毒變異速度快，加大了研發疫苗難度。美國藥廠Moderna已率先將首批快速研發新型冠狀病毒疫苗，交付美國政府研究人員作人體測試，檢測劑量注射安全，能否觸發預防感染的免疫反應；但最快初步測試結果要到7月或8月才出現。

新冠狀病毒如果與沙士一樣，突然消失於無形，日後可能無法開發疫苗；沒有疫苗，只有解藥打救。據國內傳來隨機雙盲臨牀數據消息，肺部新冠狀病毒受感染出現肺炎，使用咗Remdesivir之後，氧飽和度（SPO2）迅速上升；本來用於伊波拉嘅Remdesivir，從偶然嘅英雄，行運到完全無晒朋友，網上已被稱「人民的希望」，一夜之間升上主席位置了。

全文刊於《星島日報》「創科廣場」