自認麻煩友難服待 黃浩然唔打擾黃心穎：佢自己可以復元到

黃浩然受訪電台節目《舊日的足跡》，看似活潑好動的浩然在節目中坦承自己是個沉悶的人，雖然就讀大學時是跳舞學會主席，以往都很高調，但現在回想起自己都想作嘔。當年畢業後，他只想找份安穩工作過一生，誰知竟有緣遇上師傅杜琪峯，並參演了電影《十萬火急》，從此踏上星途。

黃浩然謂首見自己現身大銀幕非常有滿足感，自此令他醉心夢工場。可惜浩然入行後，香港電影走淡，他轉戰電視界，由不知天高地厚的「死𡃁仔」，到擔當男主角。浩然對最近熱播的《法證先鋒IV》寄望甚殷，他更謂：「為咗有更好嘅演出，我重溫咗之前三集《法證先鋒》（系列）。小青姐（監製梅小青）要求好高，人人拍古裝都唔敢畀佢望太耐，因為個妝隨時要從頭執過……佢（小青姐）事事親力親為，驗屍咁驗。今次劇本好精細，演員要95%跟晒台詞，唔係人人都食得起，我當然不敢怠慢，食飯、瞓覺、上洗手間都在背台詞，我依家發音標準咗好多。」

被問及該劇與黃心穎的戲份要重拍會否感到可惜？浩然表示：「當時都擔心套劇出唔到街，幸好有三個好彩：好彩公司畀咁大資源重拍呢部份；好彩所有演員都有期；好彩我未剪短頭髮……其實同心穎合作好好㗎！係好愉快嘅經驗。」他又謂：「依家由湯洛雯（阿湯）補上，我爭取同佢排戲，仲喺去台灣拍外景嘅前兩日，我哋排晒戲先出發，現場一氣呵成，其實阿湯都好有經驗。」浩然希望觀眾將焦點放在阿湯的努力上，因為其角色十分複雜，要演繹多種不同層次的內心狀態，確實花了不少功夫。就黃心穎早前返港，浩然謂：「我大男人一個唔會騷擾佢喇！如果佢要約我哋隨時歡迎，佢應該自己可以復元到嘅！」

浩然表示雖然在電視台從未得過大獎，但非常感恩曾嘗試演過很多不同角色。他在電影圈也有情意結：「就係希望師傅杜琪峯唔好咁快退休，我要做佢一套戲嘅男主角。我依家係電影圈新人，希望同新一代擦出火花，我要落力去做，取得觀眾認同才算任務圓滿。我一直覺得自己係『麻煩友』，連太太都話我難服侍，其實我已經改咗好多，我嘅字典係你唔鍾意我，都唔好憎我！仲有，六年前因大病失掉《張保仔》主角之後，我更加明白家庭與事業取得平衡仲未足夠，要家庭、事業同健康三線並行先算成功！」