【金像獎】19歲易烊千璽越級挑機　古天樂郭富城齊爭影帝

《第三十九屆香港電影金像獎》的入圍名單今日出爐，前年首度封帝的古天樂（古仔）今年再憑《犯罪現場》，與另一影帝級人馬《麥路人》的郭富城（城城），以及《少年的你》的易烊千璽、《金都》朱栢康和《叔．叔》的太保，一起爭奪影帝寶座！對此，古仔表示：「平常心，入圍已經好開心，最希望大家身體健康。」

去年率先憑《金都》入圍金馬獎「最佳男主角」的朱栢康則謂：「首先一定要感謝上帝，喺我人生裏面，佢為我安排咗好多好多嘅路，成就咗好多好多嘅嘢，縱然有高低；另外好想多謝金像獎嘅評委們，或者投票嘅同業，多謝你哋喜歡我嘅角色同表現。對於我嚟講係非常非常之大嘅Surprise，因為以我短短喺呢個電影業嘅時間，可以同咁多神枱級前輩躋身呢個提名名單，其實真係非常非常榮幸，所以提名我當攞咗獎㗎喇，呢句說話好多時都聽到，但以前唔會明，覺得攞埋梗係最好啦，到人生行到嚟呢一步嘅時候，當大個啲識得感恩時，其實手頭上有嘅嘢已經係最好，亦趁呢個機會多謝成就咗我嘅人，包括家人、朋友、經理人、演藝學院嘅老師，同埋《金都》台前幕後嘅工作人員、Stephy（鄧麗欣）、編劇黃綺琳等信任與提攜。」

至於太保回覆傳媒稱：「電影人生有低潮有高潮，人生也是ㄧ樣，平安最重要，香港有很多我関心的人，事及好多好朋友，希望香港平安!」此外，內地男子組合TFBOYS出身的19歲成員易烊千璽，同時亦憑《少》片入圍「最佳新演員」。