【頭條獨家】豬年做直播主持勁好玩 細細粒鼠年賣埋大碼衫

細細粒（小寶）對於過去的豬年好滿意，因為除了拍劇和參與綜藝節目，還嘗試做直播主持賣商品，以及準備做老闆兼模特兒網上賣大碼衫。展望鼠年，細細粒話創業難，守業更難，維持工作量不容易，但覺得做直播好玩的她，想新一年有機會做多啲，至於賣大碼衫生意，希望賺錢之餘，能為姐妹謀福利。
撰文：杜淑霞 攝影：李維隆

入行7年的細細粒近年發展愈來愈順，除了有不少拍劇機會，好似最近在《愛·回家之開心速遞》演「瓜姐」勁搞笑外，亦參與不少綜藝節目演出，不過豬年她最開心就是有機會嘗試做直播主持，「呢個新嘗試好啱我性格，因為我記性差差哋，直播幾似我性格，唔使記台詞，最初都驚自己直播亂噏嘢，或者遊花園唔記得講產品嘢。」

幫手設計大碼衫
除了直播主持，豬年尾細細粒還開始做老闆，在網上賣大碼衫，「好多人話細細粒咁肥，但着啲衫幾靚，我成日覺得肥都可以着得好靚好fashion，唔一定係T恤牛仔褲過10年光陰，呢方面我會好落力。」雖然細細粒唔識設計，但有為產品提供不少意見，「我主要做Model畀意見，好似肥妹着短裙加長襪都好睇，唔一定着西褲、牛仔褲，仲可以着好多不同顏色。」所以鼠年細細粒會落力搞好這個生意，至於演藝事業方面當然一樣要努力，「其實最難係維持，要守住本來嘅嘢要付出更多努力，所以真係仲難，展望新一年我希望可以喺原有嘅嘢裏面，再搵到突破位。」