【頭條獨家】表姐夫甄子丹拍戲要求好嚴格湛琪清多謝老公陪讀對白

2020-01-29 21:00

汪詩詩表妹湛琪清（Jessica）獲表姐夫甄子丹(Donnie)欽點演賀歲片《肥龍過江》，片中飾演翻譯員的她戲份都唔少，而角色跟她一樣，廣東話都係好渣，所以特別入戲。Jessica指表姐夫對她要求好嚴格，真係連親戚都冇情講：「佢push我好多，覺得我做得唔夠好，會要求我做多次，對我好嚴格。」採訪：方騫平服裝：PortsPure 場地：九龍香格里拉酒店Angelini

湛琪清自《八星抱喜》及《吉星高照2015》後已有6年冇拍港產片，今次被Donnie哥哥提攜，覺得角色最啱她演：「所以更加落力，尤其因為廣東話太差，要將對白拼音，理解同消化，好彩當時男朋友，即現任老公金承威（Kenneth）好好，無論三更半夜，定係工作中，每次攞到劇本就即時打畀佢求助，佢會好用心咁將每句對白讀畀我聽，同我練習，逐句嚟更正我發音，坦白講，佢呢個行為係成功打動到我，感受到佢係嫁得過嘅good guy！」原來當時Kenneth準備向Jessica求婚，不過，知道她開工時會好緊張，最後等咗一星期先行動。

老公包場撐到底
《肥龍過江》是兩年前的作品，Jessica結婚差唔多一周年，「今次老爺、奶奶、老公、叔仔都會嚟捧場睇首映，雖然好開心，但有壓力，因為第一次同佢哋睇我作品。老公仲打算之後包場，請埋家人、朋友再睇，佢話想支持我同埋支持套戲喎，老公知道我好愛演戲，佢會全力支持，唯獨唔太想我拍親熱戲。哈！佢好錫我，仲愛屋及烏支持埋我親人，之前拉隊睇咗兩次《葉問4》。」Jessica又指Donnie哥哥好勤力，對她要求好嚴格：「呢樣我好like，有咁大機會，我都想做好啲，唔想冇面啦。」