【頭條戲場】《變雀特工》世界上好彩有貓

《冰河世紀》系列幕後班底創作，講述一個只信自己非常招積嘅特工蘭斯（Will Smith聲演），被誤會叛變後誤飲一支藥水而變成一隻白鴿嘅故事。特工加歷險加間諜加動作連場及天馬行空，我覺得幾得意，特別係班雀，黐黐地線又好有義氣，睇戲嗰陣坐我旁邊嘅𡃁仔笑到左搖右擺，好誇張，從而推斷呢套動畫應該好啱𡃁仔睇。(剛上映)撰文:廖思慧

發明變身藥水嘅係天才科學家德仔(Tom Holland聲演)，佢好叻，15歲就畢業於麻省理工學院，之後加入特工局研發裝備同武器，堅守「非暴力唔攞命」大原則，佢由細到大嘅發明都好厲害，就係太勁被歧視，同學笑佢怪，話佢騎呢，自小無朋友好寂寞。

古靈精怪特工裝備
因為一次意外，蘭斯同德仔變成拍檔，前者開頭極度唔妥後者，覺得陀衰家無鬼用阻手阻腳死開更好，睇慣戲嘅都知兩位哥仔之後必定因誤會而了解更深，繼而產生感情。一隻雀加一個成身古怪特工裝備嘅宅男去拯救世界，搞嘢裝備包括我最鍾意嘅「貓貓閃粉手榴彈」，一爆炸會發放閃粉同貓咪影像，敵人秒速冧爆分心兼投降，本人覺得非常無敵；仲有「充氣抱抱」，能形成強勁的泡泡保護外層，令內裡嘅人免受傷害。其它武器仲有可發射勁力繩索同令人講真話嘅「多用途筆」、「碰碰萬花筒」、「催眠星星」同「打喊露魚雷」等等，統統得意又過癮。

究竟點解要係雀?導演Nick Bruno笑說：「白鴿無處不在，全世界每個城市都有佢哋嘅蹤影，冇人會留意佢哋，所以特務化身白鴿就最方便行事！」