林師傑疑擺舊相刺激減肥　脹爆歐陽巧瑩懶理照食朱古力

擁34C火辣身材的「咪神」歐陽巧瑩（Tammy），前年11月下嫁拍拖4年的林師傑，早前她仲宣佈今年3月約滿TVB後，便會退出幕前全力做「生仔機器」！直至本月初，Tammy陪老公出席《識玩旅行團2》慶功宴時，被本報發現她身材明顯走晒樣，仲腰粗兼肚凸凸，難免令人懷疑「造人」成功，不過夫婦倆已齊生否認，當時Tammy更笑謂：「因為開心，日日食同瞓，𠵱家食好多維他命，營養充足咗。」

Tammy食得開心，不過林師傑見到老婆由「女神」變「幸福肥師奶」，唔知係咪有啲唔高興嘞，事關Tammy剛才於社交網貼出一張照片，相中，白色相架裏面放了４張她昔日的Fit爆泳照，Tammy寫道：「自從我老公擺咗呢個相架出嚟……彷佛每一刻都提醒緊我：『你好肥啊𠵱家』、『點解你要放棄自己啊？』、『振作啊！』，每次望到張相……我都會傷心一秒照一照鏡，然後…………覺得自己𠵱家好開心，跟住就食粒朱古力。」但她爆粗笑稱下次再望到張相，就會覺得自己好戇居。一眾圈中好友紛紛留言大笑兼鼓勵她，江嘉敏笑說：「我肥我開心！」梁麗翹則表示：「最緊要健康，自己開心就得啦！」