【古天后日誌】輕資產及新經濟股來年繼續sharp醒

12月31日，大致多雲，有幾陣微雨及有薄霧，晚上氣溫較清涼，出去迎接元旦著多件衫喇。差O的以為美股只係識升唔識跌，但隔晚美股出現回吐，三大指數周一受壓，跌幅大約係0.6%左右，講真相對近日升勢，隔晚回吐壓力唔算大。截至上周五為企，標指累計升幅已近三成，嚟到現水平估值唔算平，出現回吐亦好正常。港股隔晚ADR及夜期亦隨之回軟，齊齊跌逾百點。目前恒指喺新加坡黑期亦跌逾百點，喺28200水平徘徊。 上星期古天后都有留意到，金價連日回升，隔晚國際金價升勢持續，連升五日並創近三個月新高，見每安士1518美元。金價回升反映資金開始傾向避險，不過元旦假期在即，即使資金唔避險，喺股市減磅亦係人之常情。總結今年古天后所推介過嘅股份，表現都唔錯，喺年初唔少所謂專家對2019年港股預測悲觀嘅同時，古天后以炒股唔炒市嘅策略應對，一年落嚟總算有斬獲。 講真古天后好少對每年指數進行預測，因為中O左係好彩，唔中係應該，尤其喺現今資訊高速流轉及爆棚年代，股市走勢更受個別消息影響，以技術走勢作預測相對更為困難。不過今年第二季之時，曾接受雜誌訪問，當時古天后已表示，恒指高低位已出現，結果望番轉頭，低位正正係今年1月初嘅24896點，而高位就係4月嘅30280點，果然及後港股已再無突破呢兩個高低點。 而訪問中亦曾預測，今年醫藥股、物管股及內需股可以喺下半年繼續跑贏，結果呢三個板塊表現都算係咁，雖然下半年醫藥股受累帶量採購及藥品降價所影響，第四季表現平平，但拉勻一年睇，醫藥股仍錄得相當可觀升幅，中生製藥(01177)更以逾一倍升幅，成為今年表現最佳藍籌股。 至於古天后亦預測到中美貿易談判將持續，雙方關係唔會惡化，談判並唔會破裂，甚至做個樣可以達成部份協議，結果中美雙方果然喺拉拉扯扯之下，達成初步協議，並於1月進行簽署。正因為咁樣，人民幣嚟到年底仍終於逼近番七算水平，兌美元失守七算後，並未有一瀉如注，A股近期反見回勇。正因為睇漏O左人民幣表現未至太差呢個因素，今年都算係走漏眼O左內房股呢個板塊，板塊內唔少股份創新高，呢一點確承認有O的跌眼鏡。 年初睇好5G概念股大炒，結果呢個板塊係年頭跟第一季攞晒彩，跟住就一直向下沉，直至近日先叫翻炒，呢一年睇番其實年頭年尾只係打個平手。反而晶片股及手機設備股就愈炒愈有，先低後高。而年近呢個幾月，新股可以話係市場焦點，幾乎所有新股上市都有唔錯表現。值得留意今日開始招股嘅艾德韋宣(09919)，噚日開始路演竟然邀請倒劉嘉玲大駕光臨，而嘉玲姐更加表現會身體力行入飛參與，呢隻新股應該都有一定睇頭。會唔會好似今日掛牌嘅赤子城(09911)未掛牌暗盤就錄得近倍升幅，古天后無水晶球答你唔倒，但抽得中艾德韋宣，應該都有份新年禮物收吓。 展望來年港股可能同樣要用番炒股唔炒市呢個策略，繼續隨資金流向追逐唔同板塊，而來年輕資產及新經濟股，將會繼續係焦點。今年港股大除夕只有半日市，提早收爐，祝大家來年喺股市繼續有斬獲。 古天后 (徐狄怡，證監會持牌人)