【維港會】急症院長蕭粵中親拍片 改編《少林足球》教急救嬰兒

新手父母面對小朋友的意外狀況，經常都覺得手足無措。香港急症科醫學院院長蕭粵中，就夥同兒科專科醫生李偉健，齊齊扮成《少林足球》的阿星同大師兄，拍片教家長如何為嬰兒進行CPR（心肺復甦術）急救。

片中兩位都穿上和尚服裝，帶上黑超，模仿經典的「少林功夫好嘢」一段，改編做「CPR係好嘢」，歌詞融入CPR步驟，包括「先做心外壓30下」、「人工呼吸記住吹兩下」，非常趣怪。片尾就回復正經，用BB模型手把手示範做CPR，教導家長先拍BB腳底幾下，如果發現無反應，就應即刻叫救護車，簡單易明。

其實兩位醫生早前還同樣模仿了星爺的《西遊記之仙履奇緣》，化身唐三藏同孫悟空，改編了經典Only You一幕，告訴父母「在救護車來到之前，唯一能救到BB的『只有你（父母）』」。兩段片都只長2分鐘，短短一段就幫新手父母學到不少急救手法。