【頭條獨家】為娛圈發展打好基礎馮盈盈望新一年進修演技

2019-12-26 19:30

馮盈盈最近獲邀為馬會宣傳2020年的「好運1月1」賽馬日活動，她預告到時會帶埋家人入馬場，順便投注碰碰運氣，發返個新年財。講到新一年願望，盈盈希望上堂努力進修演技，因她今年搵老師學好粵語改善懶音及咬字相當有成效，更明白要在這行好好發展，不斷學習打好基礎永遠是最佳方法。撰文：杜淑霞攝影：李維隆髮型：Tonnis Lee@HAiR 化妝：Carmen WongWM@Carmen W Makeup 場地：沙田馬場

盈盈自言大學時做過馬會兼職，相信到時「好運1月1」對投注方面有一定幫助，「我嗰時負責宣傳個投注Apps，所以對呢方面都有啲認識，識得點用個Apps幫手投注，加埋嗰時做兼顧仲認識咗啲專家，希望到時可以攞啲貼士，發個新年財。」

搵老師學好粵語
19年快將結束，盈盈坦言這年有不少演出機會，朝住好方向發展，她更自爆有搵老師學好粵語，「入行後不時畀人話咬字同懶音嘅問題，於是扚起心肝搵咗好尊敬嘅前輩報幕羅山先生上堂，雖然學咗時間唔係好長，但真係獲益良多，大家真係聽得出我有改善，同埋學完後都有個傳承粵語嘅責任。」盈盈坦承未學好粵語前唔知改變咁大，令她決定未來一年繼續學習，「希望新一年令自己根基再穩啲，始終自己演戲唔係科班出身，冇好強嘅訓練同學術根基，所以新一年會搵空檔同埋機會，去海外進修又好，或者讀本地課程都好，可以重返校園以學生嘅身份學多啲，令自己對呢門藝術多啲認識，雖然我知時間好難控制，但我會盡力㗎啦！」