【分開過聖誕？】蔡思貝肉緊咀靚湯　「男友」胡鴻鈞同馬明玩HeHe

聖誕是普天同慶的日子，當然要約一大班朋友出來慶祝啦！昨晚，蔡思貝（Sisley）和湯洛雯（靚湯）則出Po自爆一起於家中過聖誕，二人更着晒「姊妹裝」於聖誕樹前，好溫馨地攬住狗仔影合照，其中一張Sisley仲好肉緊咁作狀咀靚湯，Sisley以英文留言：「S for sisterhood, for strength and for Santa! Merry Christmas everyone!」又Sweet爆Hashtag「ibroughtmetoyou」，見她頸上綁上絲帶，唔通當自己禮物送畀靚湯？不過咁肉麻的招數，是否應該對住「男友」胡鴻鈞（Hubert）做先啱呢？

以往大Party都不時見到Hubert與Sisley同場，不過未知是否早前被踢爆暗撻呢？搞到這對「緋聞男女」好低調，今年聖誕都暫時未見二人的合照，Hubert更突然轉玩「HeHe」𠻹！他昨晚於社交網分享與馬國明（馬明）的合照，相中着住「姣婆桃紅Tee」晒老鼠仔的馬明，仲同Hubert一齊用手合併出一個「心心」，Hubert搞笑留言：「我叫佢搵件紅噹噹啲嘅衫嚟應吓節，佢話我知佢專登摷番呢件家傳之寶1001件嘅粉紅色Tee出嚟，我好感動。」之後又爆馬明主動擺「心心」Pose，他續說：「個下殺咗我一個措手不及，部相機唔係好想對焦落我哋個樣度，所以矇矇哋敬請見諒！」最後更自嘲朦朧中「仲靚仔咗」，認真爆笑！