【頭條獨家】7億富婆變阿四　曹央雲為愛女速遞壽司

現年45歲的94年亞姐季軍曹央雲，貴為7億資產的富婆，面對家中兩位千金Audrey和Promise，都要跪低做「阿四」！日前收到Order，曹央雲即化身「外賣速遞員」，為囡囡撲出銅鑼灣超市買壽司，惜未知對方是否要求多多，左揀右揀，搞到她頭髮都亂埋！採訪：梁志明

自09年跟富商何永安離婚後，曹央雲一直獨自湊大16歲的大女Audrey和10歲的幼女Promise，多年來她都錫到囡囡燶，更甘願做「阿四」服侍她們。而日前晚上7時許，曹央雲現身銅鑼灣時代廣場一間超市，穿上一條粉藍色連身短裙的她大晒白滑纖腿，雖然已四十有五，但驟眼睇，與一般輕孰OL無異，依然保養得宜。當日甫走進店內，曹央雲即衝去冷藏櫃前揀壽司，只見她一路眼望望，一路不停拎住個電話講，跟手拎起盒加州卷又放番低，估計電話另一邊是其中一位千金，而做阿媽的曹央雲應該在問緊寶貝女想食乜。結果揀了足足15分鐘，她終於選定了三盒壽司，為免買錯畀囡囡投訴，曹央雲用手機影低Send給對方，再三確認。

急急回家餵女
收到電話Confirm後，曹央雲便安心地推住架車仔再逛吓，見到一堆靚芝士，她就忍唔住拎起一嚿芝士起勢又聞又撳，不過索得幾仔細都好，最後都係齋睇冇買；之後，在隔離看到一啲鬼佬醃製品，曹央雲又手多多拎一樽研究，結果還是睇唔啱，直接攞住幾盒壽司去畀錢，然後急急腳行返禮頓山寓所餵女。