【頭條獨家】首拍《入住請敲門》遇靈異嘢 Stanley Anson Lo怕都恨再拍
2019-11-28 00:05 
ViuTV人氣節目《入住請敲門》下月將推出第三季，今次除了由莫竣名（MCM）和林婷繼續主持外，仲新加入MIRROR成員Stanley（邱士縉）和Anson Lo（盧瀚霆），分別到台灣及日本拍攝，當然有遇到不少靈異事件，不過4人都話雖然怕，但仍想再拍，更提議下一季去得更遠探靈，笑言可去馬爾代夫睇吓有冇水鬼𠻹！撰文：杜淑霞 攝影：李維隆
主持了兩季的MCM和林婷話今季最大分別是兩人終於合體齊齊出動，仲會帶埋Stanley去台灣和Anson去日本，他們話成個團隊都多了人，氣氛更好，MCM仲話：「多咗人畀我整蠱，但最容易驚始終係林婷囉！」他和Anson更大爆林婷遇靈異聲音仲嚇到喊。
馬爾代夫搵水鬼
至於新丁Anson就話本身好信鬼神，知道要拍該節目都好期待，仲大爆自己淆底經歷，「嗰集個主題係招啲BB鬼，師傅叫我攞啲糖擺喺床邊，我仲懶叻擺喺枕頭邊諗住易拍到，點知解我喺度玩直播嘅時候，不斷聽到有人敲窗聲，仲有好多人喺直播度話畀我聽見到小朋友，連阿Dee（Error）個朋友都話見到叫我小心，嗰吓真係淆底，唯有將啲糖掃番落地大覺瞓。」本身是節目粉絲的Stanley同MCM去到台灣一間荒廢寺廟嘗試探靈時，竟然聽到回應，「我哋問佢嘢，佢真係發出啲聲係答緊我哋咁，嗰吓真係毛管戙，咁大個仔未試過咁驚。」
雖然嚇餐死，但4人都話自己去旅行時，反而唔會理酒店有冇鬼，費事自己嚇自己，而Stanley和Anson又話下季都想再拍，4人又興奮提議之後可以去得更遠，譬如歐洲、南美洲，甚至馬爾代夫，他們異口同聲話：「應該邊度都有鬼嘅，馬爾代夫都係（睇吓有冇水鬼？）係囉！好提議呀！」
最新回應