【頭條獨家】誓要4年儲300萬老婆本 龐景峰月使6千好慳家

郭秀雲兒子龐景峰（Andrew）與拍拖兩年的女友何佩珈（Peggy）都鍾意狗，去年有朋友的秋田犬生咗狗仔就送了隻給他，他終如願以償有自己愛犬「梳打」。日前Andrew與Peggy一齊去灣仔添馬艦公園放狗，兩人愛錫梳打如自己個仔一樣。問二人想結婚生仔嗎？Andrew直言Peggy仲要讀4年書，他現以拍戲、唱歌、賣波鞋和開武術演藝學院，四管齊下望儲到300萬結婚，他更承諾會將搵到嘅錢全數畀晒未來老婆，Peggy冧晒啦！撰文：李佩儀 攝影：李權威

Andrew親生父親是錢小豪，繼父是已故「鋼鐵大王」龐鼎元的細仔龐傑。家住半山的他，常常帶梳打去行山和跑步，他表明自己是嚴父，放狗當日，他見到梳打與其他的狗玩得太癲會喝止，反而Peggy鍾意用軟功，故被指寵壞愛犬，他們笑言當梳打是自己個仔一樣咁錫。曾稱視Peggy為結婚對象的Andrew，問他有沒有結婚時間表？他坦言：「要儲夠老婆本先，最少都要300萬喇。」他表示現時工作除了拍戲、唱歌和在網上賣波鞋，嚟緊他還與朋友夾份開武術演藝學院，他續說：「好在我好慳家，一個月只使6千蚊，所以都儲到錢。」

只是Peggy仍是學生一名，她現於理大修讀翻譯，還有兩年才畢業，Peggy稱：「畢咗業仲想讀多一年碩士同一年教育文憑，因為我想做幼稚園教師。」Andrew即接着說：「所以慢慢儲吓錢都未遲。」問現時同居的他們怕唔怕未婚懷孕時，Andrew笑言會好小心，應該冇問題，平日Peggy更會親自下廚煮飯畀Andrew食。問Andrew喜歡Peggy甚麼時，他好坦白話：「雖然佢有好多缺點，但個人好真，所以我一定唔會離開佢。」而Peggy就鍾意Andrew夠貼地，知道自己做緊乜，冇乜富二代的架子。