【頭條獨家】飆高音獲鄭裕玲讚好 56歲鄧建明求教年青音樂才子

56歲的太極樂隊主音兼結他手Joey Tang（鄧建明）將於本月20日在Star Hall舉行《Music Playground演唱會2019》，作為Rock star梗係Rock到盡，為咗增加持久力，唔會唱到變嗌歌，Joey喺開show前夕求教30歲年青音樂才子Nic Lau嚟改善唱歌技巧，學咗8堂，連有要求的鄭裕玲(Do姐)都讚不絕口，喺商台節目《口水多過浪花》中叫他講解吓點樣將高音唱得咁好，Joey哥學有所成，開心到飛起！採訪：方騫平 場地：星格流行音樂學院

距離開個人show愈來愈近，Joey Tang勤於練歌，仲搵來唱過《搖滾大俠奏》音樂會的Nic做導師，當日上堂正值練習Queen的《Bohemian Rhapsody》，Nic邊彈琴邊指導Joey飆高音小技巧，原來唔使擁有鐵肺都能唱出驚人效果，Nic大讚呢個學生領悟力強：「佢好謙虛，其實係知道原理嘅，我只係提佢調整，將啲嘢放返大去做，佢好神奇，每次講完消化一兩分鐘，就可以唱到，好勁。」Joey就讚Nic幫到手：「以前啲人覺得我係嗌歌，依家追求到音域。」

Joey希望唱功有進步
問到Joey縱橫樂壇30年，搵個口靚仔教唱歌可會冇面？Joey笑說：「我個人不恥下問，唱咁耐都想進步，咪要搵人教囉，而且冇分年紀係達者為先，而且今次我揀咗好多，《小雨落在我的胸口》等有難度嘅歌，要唱得好。(有冇被批評到冇晒信心？)唔會，佢好nice，只會顧及我感受話『Joey哥，歡迎嚟研究吓！』其實我梗係嚟學嘢啦。」本月7日牛一的Joey當日做Do姐電台節目嘉賓，並為該節目創作及演繹的新Jingle(宣傳聲帶)交功課：「我都好驚Do姐反應，好彩佢好開心，覺得唱法好高音好正，仲叫我喺節目度分享吓技巧，呢個真係我最大嘅生日禮物。」