【專欄】好心你啦宋楚瑜

台灣，真係有好多「古靈精怪」政客，部分出道時朝氣、正氣皆勃勃，相格清廉，抱負鮮明，吸引大量擁躉，於是，正常發展，在政壇或政府佔有重要位置。只可惜在權力醬缸打滾愈久，性格及相格變異愈大，慢慢利欲薰心，變成油淋淋，看之令人厭惡。

台灣政客，不少已「下海」了數十年，見上述「條件」的，包括連戰、蘇貞昌、呂秀蓮、吳敦義、王金平、陳水扁……

正在漸變的有朱立倫、賴清德、韓國瑜、郭台銘、柯文哲及洪秀柱。

另一段數日高但受歡迎程度日低的，正是突然宣布又參選總統的宋楚瑜，此君七十有七，明知冇機會當選都走出來「獻世」，為乜？大家喜歡政治分析的，可將佢當作人辦解剖！睇宋楚瑜履歷，真真巴閉兼水蛇膥咁長，學歷呱啦啦，單單美國、澳洲及韓國榮譽博士銜都有N個，政府工作經驗在台灣中也是一等一人物，冇幾多個會犀利過佢。

不過，可能野心太大，頗有政治變色龍特徵，一時打政府工，一時做國民黨秘書長，一時又變親民黨主席，因想自己做大佬。二○○○年已心存大欲，突然「扮」無黨籍參加總統選舉。正因「無黨籍」，即冇人照，結果計錯數，些微之差敗畀日後的「台灣奸王」陳水扁，條氣非常之唔順，遂再於二○一二年、二○一六年再「跑」，因人氣日漸滑落，輸完又輸。

哈，究竟佢有冇照鏡的呢？如今成條「過氣政治油條」款，竟跳出來揚言開展第六戰，並煞有介事指是自己「終局之戰」（鬼有人關心）。唉……佢贏得出就恍似九十九倍大冷馬突爆！

台灣媒體有個「網絡溫度計」，天天對政治人物的受歡迎及影響力做調查，其中一項，叫「網絡聲量」，計算及分析網友對不同政治人物的討論、新聞報道率及關注的文章則數。

當然是韓國瑜及蔡英文排頭兩位啦，即是，得佢兩個跑！宋楚瑜排第幾？二十三！仲選？好心你啦喂！(曾智華)

全文刊於《星島日報》「阿碌開咪」專欄