【頭條獨家】身家億五 最鍾意同細路玩 揭鄭伊健不老之謎

話咁快鄭伊健就52歲，年頭先喺香港開完六場演唱會，之後再去美國、馬來西亞同內地開Show，有觀眾緣好重要，咁都要啲歌好聽嘅。未有戲拍嘅伊健唔算太忙，喺巡迴Show之間都可以約朋友飯聚。11月3日(日)，伊健開完天津Show翌日即約老友，其御用監製陳光榮及兩女一男一小朋友一狗狗食晚飯，發咗小小福，頭髮依然咁濃密的伊健大部份時間同小朋友吹水，離開時一大一細黐實密密傾，畫面好治瘉。明白點解伊健5字頭感覺仲咁Young，一有錢，二心境年青，明晒。採訪:張詠森、李維隆

鄭伊健真係好完美，靚仔但專一，有錢又孝順。同蒙嘉慧結婚六年，早前就將旗下公司「EK Plus Limited」加入太太名字擔任董事，又掟千萬買入元朗地皮起村屋送畀岳父安享晚年。11年老婆遇上交通意外，翌年遭被撞車上乘客入稟高院索償403萬，當年仍屬男友的伊健，全面協助YoYo面對官司訴訟，官司終在去年尾完結，獲法官宣判賠償金額減至51萬，成功為妻討回公道。

有樓有錢好富貴
而伊健在年初在港完成6場紅館演唱會後，為獎勵自己，一向愛買「磚頭」保值的他，斥資過千萬購入大埔白石角雲匯三房單位，據知由操財政大權的鄭太決定購入。其實伊健一向愛買磚頭，多年來名下持有的物業有增無減，現他跟太太蒙嘉慧在淺水灣雅景閣的愛巢，於2007年以2,800萬購入，現時市價已升至6,000萬，計埋早年買落的黃埔花園、西貢村屋、匡湖居及元朗地皮，估計身家達億五。

同小朋友好好傾
當日晚上7時，伊健同朋友去咗淺水灣寓所附近的食肆食Pizza，一行六人加一隻古代牧羊犬開心食足個半鐘，伊健同坐對面嘅小朋友好好傾，差唔多傾足成程。食飽埋單，眾人籌期，每人兩百好經濟，伊健食飽戴番副眼鏡就離開，望落伊健好似發咗福，面圓身又圓，一行六人離開餐廳，伊健開頭掛住撩狗狗，之後就同小朋友繼續行住傾，一直行到返屋企。