【頭條獨家】同陳瀅拍外景有講有笑楊明諗住女友唔怕被電暈

2019-11-11 19:00

楊明同陳瀅日前喺西貢早禾坑碼頭拍外景時，獲劇組高設防包圍及保護，傳媒不能走近探班。

最近「大忙人」楊明連踩兩組電視劇，疊住演出劉家豪監製的《逆天奇案》及陳耀全的《伙記辦大事》。日前他跟陳瀅(Jeannie)去咗西貢早禾坑碼頭拍《伙》劇外景，現場途人唔多，拍得相當順暢。呢期好旺的楊明戲裏戲外都笑騎騎，仲不時同索女陳瀅有講有笑，小心傳緋聞喎。採訪：方騫平攝影：李權威

楊明喺新劇《伙記辦大事》做交通警，但成套劇都無緣騎上鐵馬。日前楊明去西貢拍外景，場口講陳瀅飾演的卧底貨Van司機，因為要車社團成員李泳豪去碼頭著草，刻意駛走楊明去買雪糕。因為係文戲，兩人拍得相當輕鬆。N次演警察的楊明好入戲，chok到爆，他強調唔擔心喺呢個時候做警察會較為敏感：「早於喺《機動部隊2019》、《機場特警》、《網絡騙案》我都係警察啦，演員係要做好本份，而呢套劇就以感情戲為主，其實唔太關警察事。開外景至今都好順利，無受到任何事情影響，不過公司都有畀指引我哋，提醒我哋要睇環境，小心啲執生去保護自已囉。」