頻NG食咗半包煙 楊柳青拍到想嘔聲沙

楊柳青最近在無綫劇集《解決師》飾演性感俏秘書，但在新片《催眠．裁決》中，她則收起媚態，扮演職業殺手，除有埋身肉搏武打戲份外，更有不少槍戰鏡頭，十足女中豪傑。
動作戲對楊柳青來說是駕輕就熟，但論到拍攝槍戰，她卻是首次嘗試。她說：「成日都忍唔住眨眼，唔識點揸槍，好彩遇到今次動作導演錢嘉樂，我同佢第一次合作，喺佢身上獲益良多，佢唔單止教我點揸槍，仲教我好多拍動作戲技巧。」
楊柳青直言跟錢嘉樂合作後，即封對方為偶像，期待可以再度合作，「平時見佢演嘅角色好搞笑，但佢一去到片場就會好認真，佢仲分享咗好多做動作演員嘅經驗畀我，以前我NG會覺得尷尬，怕影響到其他演員，係佢同我講動作演員唔應該怕NG。」

楊柳青續說今次拍攝，雖然沒有被動作戲難倒，卻被一場「食煙」考起，搞到頻頻NG。她說：「平時我係唔食煙，今次第一次要拍食煙鏡頭，可能出嚟效果唔夠型，所以頻頻NG，一個簡單食煙鏡頭，一食就食咗半包煙，唔慣煙味，邊拍邊想嘔，拍完呢場戲，聲都沙埋。」認真大犧牲。
問到除了打之外，還想演甚麼角色？楊柳青笑言不敢貪心，想繼續從武打方面讓觀眾認識她，說：「希望可以楊盼盼、楊紫瓊、楊麗菁後，提起武打女星，大家會叫得出楊柳青。」