新一代花旦「EQ與IQ都很高」 羅仲謙大讚張曦雯：以後跟佢搵食

有樣有身材的張曦雯取代本來由李佳芯主演的劇集《踩過界2》，被指獲捧為無綫新一代花旦。身為新劇 《木棘証人》拍檔的羅仲謙，大讚張曦雯EQ同IQ都很高，更笑言日後要跟她搵食。文：鄺芷瑩　圖：朱偉彥

羅仲謙（謙仔）與張曦雯（Kelly）早前為新劇《木棘証人》拍攝一幕英雄救美的戲分，劇情講述扮演律師的張曦雯，為了案件而跟蹤黑社會大家姐，繼而被對方的手下追擊，最後謙仔駕電單車及時前來營救。

雖然當日拍攝時正值下着毛毛細雨，但無礙張曦雯和謙仔的演出。為了演出被黑社會人士追尋的戲分，張曦雯要匿在巨型垃圾桶後面，但她毫無怨言，只感到少少辛苦。她說：「因為要着住高跟鞋跑來跑去，由朝早7點跑到下午，雖然匿在垃圾堆，其實係道具，唔係真垃圾，好乾淨！」

上演「英雄救美」

劇中扮演警察的謙仔，表示動作戲不算太多，但今次要上演駕駛電單車營救張曦雯，由於本身沒有電單車牌照，所以要由專業替身代勞駕駛電單車演出他的戲分，不過謙仔直言有意考電單車牌，有待日後方便拍攝工作。他說：「我好鍾意有型又穩陣的電單車，都想去考牌，第時可以遊車河。」

談到劇中扮演律師，張曦雯坦言角色性格喜歡講道理，感覺比較巴渣，演起來不會困難，反而幾輕鬆，因為有些情節頗為搞笑。問到演出經驗較豐富的謙仔可有向張曦雯教路？謙仔聞言即笑謂：「我多少少咋，唔敢教！我反而覺得在她身上學到好多。」在旁的張曦雯表示經常向謙仔請教，但謙仔笑稱自己即時替張曦雯問導演。張曦雯說：「謙仔畀好多意見我，不同層面的工作問題都教我。」謙仔笑道：「將所有老屎忽啲嘢教佢，點樣捱夜同埋跟劇組溝通得好啲。」

取代視后不怕被比較

李佳芯去年憑劇集《BB來了》勇奪視后寶座，本來前途一片光明，但由於早前於社交網站發表言論，被無綫急凍減少工作量，無綫更改為力捧有樣有身材的張曦雯，成為新一代花旦，除了取代李佳芯演出《踩過界2》外，亦接拍多套劇集。對於被指為新一代花旦，張曦雯坦言公司安排工作會盡量去做，亦多謝公司給予機會。她說：「大家近排睇到的劇集演出，都係少少戲分畀我客串演出，並非外間所講咁多。」

為新劇 《木棘証人》首次擔正做女主角的張曦雯，直言只有盡力嘗試做好自己便可以，亦不會想太多問題。問到可擔心有人將她跟李佳芯比較？她說：「我覺得這一行無得比較，除了李佳芯外，還有好多演員，如果大家都做得好，是一件好事。」

此外，問到可覺得拍檔張曦雯能接棒成為無綫新一代花旦？謙仔大讚張曦雯EQ同IQ都很高：「平時做訪問已經睇到佢EQ好高，佢真誠得嚟，EQ高係好難！所以覺得她將來不得了，我諗第時都要跟她搵食。」