梁靖琪穿高踭鞋籌款由老公傍實 要安胎延期探訪柬埔寨

藝人梁靖琪（Toby）與丈夫施雋賢（Jon）、鍾麗淇（Margaret）、吳佩慈及蔣怡等人日前到中環出席活動為國際慈善團體AIM（Agape International Missions）晚會籌款拯救一班柬埔寨雛妓。

剛宣佈懷孕的 Toby 身穿紅色晚裝及三吋高踭鞋赴宴，丈夫 Jon 與好姊妹 Margaret 全程化身「左右護法」傍實，宣佈佗 B 後首次出席公開活動的 Toby 表示，健康狀態十分好，故身體力行支持慈善，為 BB 進行胎教：「依家習慣每個星期會同丈夫去教會，每晚都會祈禱，希望 BB 聽多啲我哋講嘢，帶佢做多啲慈善工作。今年因為要留喺香港安胎去唔到柬埔寨再做探訪，不過已報咗名下年再去，唔知到時會唔會帶埋小朋友去做義工呢？」

問到丈夫可有對她穿高踭鞋有微言？Toby 笑言：「我老公非常煩，由我開始話要著高踭鞋之後，佢就上網係咁睇孕婦幾時唔著得高踭鞋，係咁叫我買過對鞋，所以今晚我行去邊，佢應該會跟我去邊，哈哈。」

Toby 又講到自己即將榮升媽媽，特別關注小朋友的教育：「知道 AIM 有創辦專門嘅學校為有需要嘅小朋友提供免費教育，依家有超過 500 個學生。」她希望可以籌更多錢幫到更多小朋友。