生日反被朱晨麗點去買蛋糕 何廣沛稱要時間摸透

何廣沛、譚嘉儀等出席無綫藝員《8月星晨》生日派對，何廣沛後日（3日）就31歲生日，他表示正日要開工拍新劇《愛美麗狂想曲》，整日都會對著李佳蕊（Ali）。問緋聞女友朱晨麗可有表示？何廣沛透露昨晚跟《大醬園》同劇8月壽星食飯慶祝，朱朱竟叫他負責買生日蛋糕。他笑說：「我諗佢應該唔記得喇！我話生日自己買蛋糕，會唔會有點兒那過？佢仲反問我係導演生日，最後佢話自己負責返。」
是否已習慣朱朱如此大頭蝦？何廣沛笑說：「佢係有自己一套，需要啲時間摸透。（佢願意畀你摸透？）嘩，咁露骨，我唔識答，要時間互相了解。」有傳朱朱跟同劇的龔嘉欣不和，他稱不知道，只知道早前《大醬園》煞科宴龔嘉欣因有事未能出席。談到生日願望，他希望能夠儲夠首期買樓。
譚嘉儀同樣是31歲生日，8月13日正日會跟朋友食飯慶祝，亦會Fasn聚會慶生。她的生日願望是希望家人身體健康，開開心心，更希望今年能夠開小型音樂會。