【維港會】不滿母子診所內玩「黑白」 網民fb公審反被插

香港作為「批鬥之都」，動輒都要拍照拍片放上網公審，甚至「小事化大」，不過仍然有很多市民依然屬於比較講道理，故很多時「隨意」公審別人的往往都反被圍剿。

日前有網民在Facebook專頁《生仔要考牌系列》投稿，指自己因重傷風去診所求醫，惟等候期間對面有一對母子正在玩「黑白」，並不斷發出擊掌聲。樓主形容「佢哋精神到你話佢病都難以置信」，質疑男童並沒有不適，而且行為擾人，「個老母仲陪你癲！我個頭比你哋拍完簡直要裂！」並表示：「呢度係診所呀，你喺餐廳咁做絕對無問題。」

帖文一出，引來不少網民討論，有人表示「餐廳都唔應該」、「幻想到又真係幾煩嘅」。不過大多網民則指樓主「咁都要受到公審」、「 我覺得開post都要考牌」，其中一位網民更指責樓主：「佢騷擾到你咪開聲叫佢細聲啲囉，咁你都無講點知人地會唔會同你say sorry啫，同埋呢，唔好怪我咁講，人哋有無病唔舒服你用對眼就睇到？可能是但一個打支針咋喎，病唔係大晒，香港都有好多好好教養嘅媽媽，唔會時時刻刻都做到100分，郁啲就影相公審人唔通你又好啱？」