蔡一傑輕鬆完成多倫多個唱 伍詠薇真空上陣歌衫險下滑

蔡一傑入行34年以來首次個人音樂會，於多倫多兩場演出均全場爆滿，並圓滿成功。伍詠薇作為特別演出嘉賓，為了傑仔「補鐘」學唱歌和訂造性感歌衫，但因太緊張愈食愈瘦，Low cut歌衫頻頻下滑，當她忘我與傑仔在台上又唱又跳時，台下工作人員就跟住她一跳一驚心，順利完騷後才敢鬆口氣。
返入後台，伍姑娘仍然好亢奮，說：「我好開心，亦替傑仔好開心，佢係我朋友、家人。呢兩場演唱會好成功，觀眾都好熱情，睇得好投入。（你做乜成日掩住心口？）哎呀，大家明明都睇住我嚟到多倫多不停食，但係愈嚟愈瘦，好驚佢瀡落嚟，我裏面真空，只有貼住兩個雞蛋仔（乳貼），一舉手就移位。山長水遠飛到嚟唱歌走光就唔好啦，好彩一切順利，返到嚟後台就可以聽住傑仔唱歌跳舞啦！」
傑仔為紀念首個個人音樂會，歌單和舞蹈都是全新編排，並以華麗、型格、活潑等多個造型演出，台上台下都非常盡興。當他唱日文歌《One》時，台下有歌迷跟住唱，令他驚喜。完騷後問傑仔心情？他風騷說：「心情輕鬆，自己狀態好，熱眾又好熱情，所以我好Relex咁去唱，成個騷我都好鍾意，台前幕後配合得好好。雖然呢度天氣比較乾燥，但我覺得自己把聲好好，唱得好舒服，好開心。」至於「愛人」伍姑娘表現，傑仔大讚超水準。