克勤拉薩登台唱《紅日》唔夠氣

李克勤到拉薩出席活動及獻唱，日前還上載了在當地身處數千米海拔的照片，怎料昨日完成演出後就分享在車上吸氧氣的短片，還自嘲首次唱《紅日》唔夠氣！

克勤於社交網站貼片留言：「條片係剛剛演出完在車上拍的，《紅日》呢首歌大大話話唱咗一萬幾千次，老老實實，我諗就算頭暈身㷫，只要唔係大病都可以憑經驗順利過渡，從來未試過有『唔夠氣』嘅感覺。惟獨是這一次在拉薩，唱完兩首歌還好地地，自己以為冇問題，到唱第三首《紅日》時，開頭兩段還很正常，於是唔識死開始周圍走周圍跳，點知一跳就出事，上氣唔接下氣，中間還停了一句唞氣……3,650米，真係唔係講笑，失禮晒。各位同業如果有機會去拉薩唱歌，請聯絡我，我有很多有趣經驗可以和大家分享。」搞笑是盧淑儀笑言取笑老公：「Naughty boy」。