為杜德偉首踏天橋 陳小春標汗嗌騰雞

陳小春為好友杜德偉（Alex）昨晩在（28日）在杭州舉行的首個自家品牌創作時裝騷首次行catwalk，壓軸出場掀起整晚的高潮。
小春完騷後受訪，直言：「我仲流緊汗，行之前唔知自己要望邊到，最後唔諗啦，昂然大步挺胸行就算啦！好彩有音樂，如果冇音樂，真係騰呀！行完幾分鐘catwalk，好似唱完半個鐘頭演唱會咁！」Alex馬上反問：「係唔係呀？」小春說：「真係！唔係講笑！我picture唔到個畫面係點，如果台下冇人有反應咁點算呢？又驚有肚腩又驚條褲會甩⋯⋯」Alex回應：「我啲衫點會呢？小春又咁fit！真係好多謝小春，因為獻出第一次，但佢完全駕馭到套衫，佢一行出場全場哄動，有小春成個騷真係生色不少！」
其他好友志偉、B哥（鍾鎮濤）則投訴：「點解剩係叫小春，唔叫我哋行呀？」Alex說：「下次要幫曾志偉設計衣服，揀套短度闊封畀佢！」Alex再問小春，下次是否願意再幫手行騷？小春爽快回答：「冇問題！」Alex說：「朋友就係咁樣啦！」完騷後，Alex與一班好友舉行after party慶功，舉杯暢飲！