現身澄清冇搶人老公 姚子羚驚訝密照流出：床照係我唔知

姚子羚傍晚時份回電視城拍劇《唐人街》，並就有被指搶模特兒蔡宛珊（Saraki）老公Raymond Young報道見記者作澄清。約6時半現身的子羚，待傳媒拍照及Set咪後淡定開腔，說：「首先我想講，我認識Raymond，同佢交往時，佢同Sarika已經分咗手一段時間，到現時為止佢哋應該分開咗兩年；我同Sarika係相識，佢亦知我當時我係同Raymond交往過。（即係依家分咗手？）我哋目前係普通朋友關係。（咩原因分手？）細節亦唔想再去講，總之依家關係對大家都係最舒服。」對被指介入別人婚姻，子羚再澄清：「我相識佢時，佢同Sarika已分開咗，到現時已兩年，分咗手一段時間，實質幾耐唔想再提及。」

問到二人親密照流出有否懷疑甚麼人會這樣做？子羚坦言：「有嘅，但目前唔想深究啲相點流出嚟，只係覺得好驚訝兩個人一啲照片會在外間流出去，我都覺得係一件好驚訝事，但都冇去諗點解會有。（有幾多人有呢啲相？）唔應該問我，一啲合照我係有。（床照呢？）我冇，床照係我唔知。（只一個人有？）如我覺得好過份行為，我會同公司商量點處理，睇點打算。」

問到是否遇人不淑？子羚說：「要講都講晒，都澄清咗。（有冇好嬲？）嬲係未有時間。（擔心有更激相或短片流出？）呢個我唔知，當然我諗我相信我自己嘅嘢，但目前最緊要想澄清返，我同Raymond相識時，佢同Sarika已分開。」

至於工作方面有否受事件影響？子羚說：「依家拍緊劇，目前做好演員本份，亦冇收任何通知，都係做返演員職責，專心工作，其他嘢唔重要，亦放低，對感情我係認真嘅女仔，想感情關係好簡單。」她坦言就這件事有跟Raymond聯絡，問到對方反應？有否道歉？她說要問回當事，隨即趕入廠以為理由，結束約6分鐘的訪問。