青談｜疫情擴散全民埋單

一元復始，萬象更新，當未能外遊的港人心情稍放鬆，趁大時大節較頻密外出用膳消費慶聖誕迎新年，為刺激本地經濟出分力、餐飲零售市道回復小陽春之際，望月樓感染群組連環爆，出街食飯冷不防已淪為高危活動，不斷搵專家研究餐飲設施換氣裝置究竟合規不合規轉移視綫，對食肆實在有欠公平，用餐脫罩是常識，罪魁禍首，源自醫學監察期間違規進入社區播毒的害群之馬。

　　其實大部分香港人已經好乖，起碼願唔願意都肯戴口罩，驚唔驚打針都打咗針，惟獲豁免檢疫安排人士已不止一次成為播毒源頭，相關人士若非真係懵盛盛，好有理由懷疑其操守與心地，更有理由懷疑，明知故犯的個別違規者，究竟是否有心人蓄意靠害，寧願置自己飯碗於不顧都要與民為敵，居心叵測。

　　經過幾天的發酵，只見媒體不斷錯判形勢、轉移視綫，還要偷換概念玩野靠嚇，指大部分長者未打針，斷估亦冇理由要為個別獲豁免人士的罔顧防疫抗疫風險、香港市民生命安全的不負責任行為埋單，年近歲晚，不斷吹風話唔打針冇得進入餐飲食肆，更反智係把打針跟防感染掛鈎，令人有打咗針就形同金身護體百毒不侵的基本錯覺，雖然錯覺早已不攻自破。小妹偶像韓國男團Super Junior成員始源早已打齊針一樣中招！天團也中招事件一不離二接二連三，早前同樣已完成接種兩劑疫苗的Lisa@BLACKPINK剛從美國返韓即確診，同樣亦從美國返韓的BTS防彈少年團七名成員中有三人確診，嚇親粉絲。

　　事件中最無辜當然係同場不同枱卻中咗招的食客，視醫學監察檢疫安排如無物的個別染疫機組人員播毒進入市區行程既緊密又精采，望月樓員工及密切接觸者躺着中槍，事件中國泰航空亦是被陷於不義的受害者，難道咁大個人仲要人釘人監視居住？執勤唔係大晒，私隱亦非擋箭牌，欠追蹤功能的「安心出行」令人更不安心，人命關天，容許小妹不吐不快，因為太多太多專家聲大大冇貨賣。

 

胡孟青

青談