阿碌開咪｜荒廢廣播大藍海

從直覺判斷、形勢分析及訊息蒐集，我都幾肯定二○二二年整個電視圈將會有點新氣象。

今次並非爭收視率咁簡單，戰綫將全面蔓延到各式網絡平台，甚至商品直銷，也是兵家必爭之地。

做傳媒，講多無謂，實力手瓜全賴收視而起（各個平台匯合），所以，既然TVB換咗兩位總經理曾志偉及蕭世和，周大福集團鄭家純買起有線電視，李澤楷仍雄心勃勃將ViuTV變成大型製作中心，再聽講內地某中央直接指揮的電視巨擘，也有「使命」要在港建立「軟影響力」，所以，當下任特首選出，一切大定後，香港傳媒生態勢將有點新發展，不似過去幾年烏卜卜死下死下，了無生氣。

不過，主軸當然仍要配合「政治大氣候」！

事實，電視台新人事新作風，當然上場立即三把火，猛度「橋」增加收視及收入，以作交代。相信幾個月後，將會不停有娛樂以外的新節目等品種面世。得唔得？唔知，起碼可以在悶局中激起少少漣漪。

前晚與幾位電視高層食「亂噏晚餐」（呢類晚餐，有美酒、有美食，氣氛一定良好，加上不似在會議室般拘謹，大家可以無拘無束亂噏，好多時正斗意念會橫空爆出）。大家估計，到時又會開始互相撬人及招聘人才，意即人工一定唧高，尤其新聞時事有分析能力又人際關係網絡遼闊者，大有市場！

小弟最喜歡賽馬，有點不忿香港電視台的賽馬節目，搞到一坺野，毫無吸引力。

「各位，我看，電視台管理層長期忽視一個大藍海——賽馬直播節目。先講數字，現在每個賽事日，投注額，合法加非法（外圍）近三十億元，馬迷數字近百萬，絕大部分不能入場，意即全部要靠電視收睇賽事直播及前後分析，但如今成個大藍海在愛理不理下被荒廢，真嘥料！」

在座一位高層即時回應：「聽講純官也睇到此現象，正部署有線集團向此方向進攻，可能會重錘出擊！」

曾智華

 

阿碌開咪