阿碌開咪｜建制力量必須晒冷

近期所有飯局話題都集中一個——星期日的投票率如何？然後七嘴八舌，個個扮專家分析。若有政府高官在場，佢或佢哋必定封口，一句都唔敢參加討論，以免「個人意見」流出街，因若所講的與官方立場（Line to Take）不一致，分分鐘烏紗不保。

早前小弟在本欄透露過，一頓有政界大哥、傳媒高層、資深分析員、專業人士及大集團CEO在座的晚餐，正正是個個摩拳擦掌開盤估投票率，打賭一餐！大家協議投票率劃在兩成半。結果資深分析員全買之下，其他全買之上。邊個中？下周一有分曉！

日子逼近，前晚又與大群資深傳媒人及大數據專家共聚。一眾最有興趣的大數據顯示如何，「專家C」指出：「若形勢大好，你就唔會見咁多有頭有面者撲出猛做『期望管理』啦。事實素來支持民主派選民反應，大家估到，但我哋不停搜羅建制派的網站及留言平台，發覺情況並非想像中的熱烈，呢個怕且要佳叔去拆解嘞。唯一可能是一種叫『贏硬遲鈍症』，既然Sure Win，就唔使好似以前咁緊張去催票、拜票、告急……」

咦，咁講，唔係幾妥喎。因這次是「完善選舉」制度的第一次投票，「愛國愛港」全陣營豈可唔空群而出一展實力？呢個陣一定不能輸！

今年最新登記選民數字為4,472,863，若用以往直選投票「黃金比率」，泛民擁躉佔六成、建制堅貞支持者佔四成的話，建制陣營出盡最少有1,789,145票。另加十萬計《國安法》實施後，見證香港由亂變治及選舉制度完善，可能會欣賞政府撥亂反正的選民。如此觀，保守估計應近二百萬！

好嘞，如今問題在，政府點趁仍有兩日時間，谷盡呢群支持者走出來投票，騷一騷實力比全世界睇呢？有冇「心戰室」在瞓身度緊呢？

投票率及投票人數皆有重大意義，輸人唔輸陣，林鄭領導下的政府，今鋪睇必須晒冷！

曾智華

 

阿碌開咪