翠如自認湊B不會雞手鴨腳

大肚黃翠如昨日出席商場活動，穿露肩鬆身裙的她自嘲身形變得「圓碌碌」，只有肩膊瘦所以露肩，自爆腰圍現時90cm，但好開心經常在家揭起件衫睇孕肚，爆老公經常同腹中BB傾計，下周二人將參加育嬰班，她只透露預產期是蛇年，早前在社交網分享BB衫疑洩露BB性別，她否認指其實是贈品。

翠如表示做產檢知BB健康和尺碼正常，懷孕後自己對飲食變得有主見，產檢完要求吃甚麼，現在喜歡出外吃飯，會叫多兩人份量，現時有抽筋情況，老公蕭正楠不讓她做家務，只要被發現即跑來幫忙，老公亦經常跟腹中BB傾計，試過對方踢波受傷而被她要求休息，老公即跟肚裏BB講：「你睇下我呀！你將來你好自為之！」翠如又指老公包辦家務、煮飯、工作及清潔，更會詐嬌叫她講句：「我覺得你太辛苦啦！」談到早前家中揼釘，黃翠如笑言老公安排她在超市行街等待，老公整完先返去接她，由於沒工具，老公人手上螺絲，搞到手損晒，所以也認為以後整修家居找師傅處理。
談到預產期，翠如只透露蛇年，揭曉BB性別有待長輩安排，她希望農曆新年後停工待產，屆時放縱任吃，下星期與老公參與育嬰班，她相信老公會雞手鴨腳，反而自己無問題，因有照顧兩位妹妹的經驗，懂得換片清潔。
否認洩露BB性別
可會考慮拍懷孕照，翠如見到賴慰玲、連詩雅影得好靚，但當想到要海邊揭開肚皮影相，覺得尷尬，要考慮，又指楊茜堯預留了很多二手BB衫給她，亦歡迎朋友送贈BB用品，覺得是福氣。談到在社交網分享BB服裝相洩露BB性別，翠如否認：「唔係！呢個係贈品！」她又指胎兒頭部較大，所以未決定哪種方式分娩，指自己跟老公都是頭較大，可能遺傳。