修哥自爆假日多節目 心姐力留新光戲院

胡楓（修哥）和謝雪心昨日現身旺角港鐵站為一間臘味店開幕擔任嘉賓，與該店第四代傳人黎曉靈一同剪綵，吸引大批途人圍觀。修哥表示一直有幫襯該店，笑言由細食到大，以前會特地到中環街市光顧。問到臨近聖誕和新年是否工作特別忙，修哥坦言有很多節目，忙做冬、去派對又睇很多演唱會，除了近日開個唱的劉德華，稍後去台灣捧郭富城場，同姜大衛、李琳琳兩夫婦去玩三、四日，要搭飛機亦不覺得頻撲，自己都鍾意放慢生活。
心姐也表示最近要應約好多朋友飯局，又透露昨日在新光戲院開完會，希望與機構商量不清拆戲院的建議，自己不希望失去一個好的表演場地，現時各方面正在努力當中，亦相信有機會到時出現一個開心結果。
今年除夕，心姐將前往佛山在一座非物質遺產古廟演出。談到新年願望，修哥笑言當然不止再開演唱會咁簡單，最緊要大家身體健康，追問是否有計劃再開演唱會，他坦承：「Yes！」至於會否邀華仔和城城做嘉賓，修哥則表示不騷擾他們。