周吉佩16年後 開個唱圓夢

周吉佩（吉吉）首次舉行個人演唱會，大晒麒麟臂並送上連串好歌，身為好爸爸的吉吉更安排一對子女上台獻唱，又把握機會借歌冧妻。
周吉佩首個個人演唱會《第三人生》前晚（30日）在旺角麥花臣舉行，樂易玲、馮盈盈、冼靖峰、吳業坤、龍婷、羅啟豪、譚輝智等齊齊捧場。吉吉以紅色閃爆西裝現身，邊彈結他邊唱《活著VIVA》及《我是憤怒》等歌曲為演唱會揭開序幕。
憶亡父淚灑舞台
大晒麒麟臂的吉吉，表示入行16年後終於可舉行自己的演唱會，多謝大家不離不棄，他解釋「第三人生」意義其實是圓內心的夢，並指剛唱的《生活道》是他在sp'ACE時期寫的歌：「夾Band係種子，寫歌係養分，千祈唔好時限到、人都老帶住問號，有夢想時就好好追，呢個係我阿爸教！」吉吉感觸地指在夢想和現實中角力，幸好遇上《中年好聲音》，在唱完《第二次初戀》後，他指有人問「吉太」是否初戀，他笑說：「佢？佢係我第5個，不過個feel有初戀感覺，但𠵱家冇，𠵱家初戀係個女。」又感謝老婆在人生最落魄的時候出現：「佢扶起我，佢話佢有3個小朋友，其中一個係我，多謝佢將我養到肥肥白白。」講到周爸爸，吉吉哽咽說：「雖然離開咗20年，但我知你一路喺身邊守護我，我喺佢身上學識好多嘢，就算有幾大問題都要笑住面對，希望爸爸今日睇到，你個仔冇令你失望！」
嘉賓尹光出場即引來全場尖叫，之後兩人合唱《Dear Myself》，尹光自言雖然已年屆80，但捱了54年才得到一個獎項，勉勵吉吉繼續努力。安歌環節時，吉吉與鍾柔美（Yumi）跳唱洗腦歌《APT.》，跳完後喘晒氣的吉吉大讚拍檔好正，又笑指自己生得出Yumi。受訪時吉吉自言對演出滿意，比想像中好，下一個目標是澳門，預計很快會開騷，更希望將來唱到大灣區和美加等地；至於唱《青春頌》時，一對仔女與合唱團一起上台獻唱，吉吉笑言是自己安排。