阿Sa見暈死頂：用生命唱歌

Twins前晚在廣州順利完成兩場《Twins Spirit世界巡迴演唱會》，全場爆滿，阿Sa和阿嬌在廣州站換新衫，以粉紅及粉綠公主造型登場；不過在廣州站尾場，阿Sa自爆作病，更一度見暈要坐在台上歇息，自言：「簡直用生命唱歌！」

前晚Twins唱到Encore環節，阿Sa突然在休息飲水時對阿嬌講：「我好似有啲作病，出晒虛汗咁，頭有啲痛、喉嚨又有啲痛，全身都痛……我要唔要戴口罩呀？你驚唔驚？」阿嬌就揚言不怕，笑問對方是否太熱才感覺不適。
然而當唱完串燒經典金曲後，阿Sa坦言：「簡直係用緊生命嚟唱歌！」隨即坐在升降台上，更直言感到頭暈要坐低休息一會。稍息後，阿Sa即回氣，用盡氣力繼續唱出《零4好玩》及《人人彈起》兩首快歌，帶動全場熱烈氣氛。
返家先知發燒
完騷後，阿Sa隨即返港，回家後自行量度體溫，並在社交網上載探熱針顯示體溫達「37.5」。
昨日阿Sa表示有問過醫生意見，指只屬低燒，經過一夜休息後已經退燒，感到好多了。談到前晚堅持演唱到最後，用生命唱歌，阿Sa坦言用意志力叫自己頂住，觀眾和歌迷熱烈反應似不停為她打強心針，所以唱最後兩隻快歌時，她投入到忘了頭痛和頭暈。
粉絲應援慶生
Twins將於11月巡唱到加拿大，阿Sa將在演唱會中度生日，她表示會在多倫多跟親友歡度正日生日，也會跟小學同學見面，「好多年冇見佢哋！終於有一年可以一齊過生日囉，都幾期待。」上次阿嬌生日獲阿Sa在紅館為她準備萬人舉牌大合唱，問阿嬌屆時會否為壽星女阿Sa準備神祕禮物？阿嬌笑道：「我聽歌迷講，會幫我哋搞神秘應援慶祝阿Sa生日，所以我就交俾佢哋負責，希望佢哋會畀神秘驚喜我哋。」