Ian拍MV踩爆結他整親腳

日前推出新歌《鑿》的MIRROR成員陳卓賢（Ian），昨午到商台接受節目《叱咤樂壇》訪問，近百Hellosss(Ian粉絲暱稱)無懼高溫，開遮擔凳拎風扇一早到場應援，並穿上Ian品牌服裝支持。

Ian剛在7月舉行了一連7場的首個個人演唱會，談到Ian在演唱會非常有心派親筆信，Ian表示是每日到場館綵排完後，新鮮滾熱辣寫的，「工作人員會話畀我知今日有咩人睇，有咩嘉賓，咁我就知道要寫畀邊個，每人嘅內容都唔同。」
搣甩「Ian腔」
完成演唱會後， Ian未有放假，立即錄製新歌《鑿》，更特別飛到台灣閉關錄音，目的只為灌錄其中一節歌詞。Ian表示錄音時起晒雞皮，感覺非常有feel，更與監製互相對望。而有些歌詞更刻意搣甩「太Ian」的唱腔，務求可以用不同聲線演繹故事。Ian更透露會有Behind the scene，例如有破壞間屋、打爛結他等花絮場景，他更自爆拍MV時整親隻腳，「因為結他好硬，要用『大力金剛腿』踩爛個結他時就拗親，現已康復。」
最後，他預告情歌系列的最終章Chapter 5將會於10月尾推出，更坦言希望可以出個人大碟，笑言連封面設計都已經諗好，「雙面碟A side係今年推出嘅5首情歌，B side係多年來嘅個人歌。」至於由他、阿Jer 、Stanley和Tiger組成的小組歌正在錄音中，Ian更大爆：「其實當初我唔係呢一組，但係公司話好似第二組好啲，所以我都ok冇所謂。」