Edan 認女神難追：但乜都有可能

MIRROR成員呂爵安（Edan）昨日出席彩妝品牌活動，對於與「大馬女神」林明禎傳緋聞，Edan澄清無拍拖，但承認在歐洲工作時恰巧明禎都在當地，坦承兩人是朋友、私下有聯絡，坦言雖然女神難追，乜都有可能。

問到Edan是否要祝賀他？他即笑言最近好多人恭喜他：「話我好叻仔！搞到我以為係奧運選手為港爭光。人哋係女仔，牽連到人哋唔好，連GiGi（梁詠琪）都要回應，所以要澄清無拍拖、無歐遊，不過我有去歐洲工作，明禎咁啱喺歐洲，約過對方食飯，咁樣被人誤會。」Edan承認兩人是朋友，在朋友聚會上認識，私下有聯絡，他有傳短訊給對方講不好意思。問是否接受姊弟戀？他說：「無話姐姐妹妹！拍拖最緊要適合。佢梗係女神，我無特定擇偶條件。我好欣賞佢，有睇佢嘅作品。（有機會發展？）唔敢諗！我驚被人打，大馬、台灣一齊打，目前我專心工作先。」
不甘被隊友睇小

說到MIRROR一班兄弟不相信他跟林明禎拍拖，Edan搞笑謂「好嬲」：「唔明點解大家唔信，再挑釁我，我就證明畀你哋睇。（女神難追？）當然！明嘅，大家都覺得無可能；但乜都有可能。」記者提議順理成章追求，Edan卻說專心工作，「隨緣！得咗話你知。」

Edan早前參演以「紙盒藏屍案」作為藍本的電影《法迷藏》，他表示自己的戲份已完成，密集式拍攝了幾星期，戲份不多但角色重要，今次好深刻，亦有好大突破同挑戰性，從未演過這類電影，因該片橫跨三個年代，而且有動作戲。問到是否演繹「歐陽炳強」？Edan即時否認稱只是演一個關鍵人物，跟梁洛施沒對手戲，跟吳冰對手戲較多。談到任達華曾經演繹電影角色，問到可有壓力？他表示無想這方面，跟很多前輩學習。

對於Frankie為女友Christy設局「捉鬼」，Edan表示看報道才知，不作評論，認為兩人經過深思熟慮，最緊要知道有甚麼影響，無對與錯。